کراچی: (دنیا نیوز) پاکستان چیمپئنز نے چیمپئن شپ آف لیجنڈز (ڈبلیو سی ایل) سیزن 2 سے قبل اپنا نیا لوگو متعارف کروا دیا۔
فرنچائز کے سوشل میڈیا اکاؤنٹس پر اس اعلان کے ساتھ کیپشن دیا گیا کہ ’’انتظار ختم ہوا، شناخت سامنے آگئی ہے، یہ ہے ہماری دھاڑ، یہ ہیں پاکستان چیمپئنز، ہمارے ساتھ شامل ہوں اور ہمارا ساتھ دیں کیونکہ ہم ہیں قوم کی دھاڑ۔‘‘
نیا لوگو ٹیم کی نئی توانائی اور عزم کی عکاسی کرتا ہے، کیونکہ وہ ڈبلیو سی ایل کا ٹائٹل جیتنے کے ایک اور موقع کے لیے تیار ہورہی ہے۔
گزشتہ سال ٹورنامنٹ کے پہلے ایڈیشن میں پاکستان چیمپئنز نے شاندار مقابلوں کے بعد رنرز اَپ پوزیشن حاصل کی تھی۔
رواں سال چیمپئن شپ آف لیجنڈز 18 جولائی سے 2 اگست کے درمیان برطانیہ میں شیڈول ہے، پاکستان چیمپئنز اپنی مہم کا آغاز 18 جولائی کو برمنگھم کے ایجبسٹن سٹیڈیم میں انگلینڈ چیمپئنز کے خلاف کریں گے۔
پاکستان اور بھارت چیمپئنز کے درمیان مقابلہ 20 جولائی کو اسی مقام پر کھیلا جائے گا۔
