لاہور: (دنیا نیوز) پاکستان کرکٹ بورڈ (پی سی بی) نے خواتین کی قومی ٹیم کے لیے 26-2025 کا بین الاقوامی شیڈول جاری کردیا جس میں دو عالمی کپ اور متعدد اہم سیریز شامل ہیں۔
اس مصروف پروگرام کا آغاز اگست میں آئرلینڈ کے خلاف ٹی 20 سیریز سے ہو گا جبکہ ستمبر میں پاکستان کی خواتین کرکٹ ٹیم لاہور میں جنوبی افریقہ کی مہمان ٹیم کے خلاف تین ون ڈے میچز کھیلے گی۔
یہ ہوم سیریز اکتوبر میں سری لنکا میں ہونے والے آئی سی سی ویمنز ون ڈے ورلڈ کپ 2025 کی تیاری کا اہم حصہ ہو گی جہاں پاکستانی ٹیم 2 سے 24 اکتوبر تک 7 لیگ میچز کھیلے گی۔
سیاسی کشیدگی کی وجہ سے پاکستان کو سری لنکا میں اپنے تمام میچز کھیلنے پڑیں گے، بشمول 29 اکتوبر کو سیمی فائنل اور 2 نومبر کو فائنل (اگر ٹیم کوالیفائی کرتی ہے)۔
پی سی بی کی خواتین کرکٹ کی سربراہ رفیعہ حیدر نے کہا ہے کہ یہ سیزن انتہائی اہمیت کا حامل ہے جس میں دو عالمی کپ شامل ہیں، ہم نے شیڈول اس طرح ترتیب دیا ہے کہ کھلاڑی بہترین فارم حاصل کرسکیں اور ٹیم کی کامیابی میں اہم کردار ادا کرسکیں۔
2026 میں انگلینڈ میں ہونے والے آئی سی سی ویمنز ٹی20 ورلڈ کپ کی تیاری کے لیے پاکستانی ٹیم فروری 2026 میں جنوبی افریقہ کا دورہ کرے گی جہاں تین ون ڈے اور تین ٹی 20 میچز کھیلے جائیں گے، اس کے بعد اپریل سے مئی تک زمبابوے کی ٹیم پاکستان آئے گی جس کے خلاف تین ون ڈے اور تین ٹی 20 میچز ہوں گے۔
ورلڈ کپ سے قبل پاکستان کی ٹیم مئی اور جون 2026 میں آئرلینڈ میں ٹرائی نیشن ٹی 20 سیریز میں حصہ لے گی جس میں میزبان ٹیم اور ویسٹ انڈیز بھی شامل ہوں گی۔
پی سی بی نے خواتین انڈر 19 ٹیم کے لیے بھی پروگرام کا اعلان کیا ہے جس میں 15 ستمبر سے 6 اکتوبر تک کراچی میں قومی ٹی 20 ٹورنامنٹ کھیلا جائے گا، اس کے بعد بہترین کھلاڑیوں کو تین ہفتے کے سکل ڈیولپمنٹ کیمپ میں شامل کیا جائے گا جو دسمبر میں بنگلا دیش کے خلاف پانچ میچز کی ٹی 20 سیریز کی تیاری ہو گی۔
پاکستان ویمنز ٹیم کا مکمل شیڈول 26-2025
- آئرلینڈ کے خلاف 3 ٹی 20 (6 تا 10 اگست 2025) آئرلینڈ
- جنوبی افریقہ کے خلاف 3 ون ڈے (16 تا 22 ستمبر 2025) لاہور
- آئی سی سی ویمنز کرکٹ ورلڈ کپ 2025 (30 ستمبر تا 2 نومبر 2025) سری لنکا
- جنوبی افریقہ کے خلاف 3 ون ڈے اور 3 ٹی 20 (7 فروری تا 2 مارچ 2026) جنوبی افریقہ
- زمبابوے کے خلاف 3 ون ڈے اور 3 ٹی20 (24 اپریل تا 11 مئی 2026) پاکستان
- ٹرائی نیشن ٹی 20 سیریز (مئی، جون 2026) آئرلینڈ
- آئی سی سی ویمنز ٹی 20 ورلڈ کپ 2026 (12 جون تا 5 جولائی 2026) انگلینڈ
