دبئی: (دنیا نیوز) ایشیا کپ اور سہ ملکی سیریز سے قبل قومی کرکٹ ٹیم نے دبئی میں انٹرنیشنل کرکٹ اکیڈمی میں تین گھنٹے طویل ٹریننگ سیشن کیا، کھلاڑی مکمل فارم میں نظر آئے اور بلند حوصلوں کے ساتھ میدان میں اترے۔
قومی سکواڈ نے کنڈیشن بیسڈ ٹریننگ پر فوکس کیا، کوچز کی نگرانی میں بیٹرز نے نیٹ پریکٹس کے دوران پاور ہٹنگ پر کام کیا جبکہ بولرز نے لائن اور لینتھ بہتر بنانے پر بھرپور محنت کی، اس سے قبل کھلاڑیوں نے فزیکل اور فیلڈنگ ڈرلز کے ذریعے فٹنس کو بہتر بنانے کے لیے بھی سخت مشقیں کیں۔
ذرائع کے مطابق قومی ٹیم آج آرام کرے گی جبکہ سہ ملکی سیریز کا پہلا میچ 29 اگست کو شارجہ کرکٹ سٹیڈیم میں افغانستان کے خلاف کھیلا جائے گا۔
کھلاڑیوں نے عزم کا اظہار کیا ہے کہ ایشیا کپ اور ٹرائی نیشن سیریز میں گرین شرٹس کو نئی کامیابیوں سے ہمکنار کریں گے اور شائقین کرکٹ کو یادگار لمحات فراہم کریں گے۔
