لاہور: (دنیا نیوز)پاکستان کرکٹ بورڈ (پی سی بی) کا کپتان کے حوالے سے حال ہی میں گردش کرنے والی خبروں پر ردعمل آگیا۔
پاکستان کرکٹ بورڈ نے ون ڈے میں محمد رضوان کی جگہ سلمان علی آغا اور ٹیسٹ میچوں میں شان مسعود کی جگہ سعود شکیل کو کپتان بنانے کی خبروں کی سختی سے تردید کر دی۔
بورڈ کے مطابق تاحال نہ تو سلیکشن کمیٹی کے اجلاس میں ایسا کوئی معاملہ زیر غور آیا ہے اور نہ ہی کسی کھلاڑی کے کنٹریکٹ کی کیٹیگری میں کوئی تبدیلی کی گئی ہے۔
ذرائع کے مطابق پی سی بی نے اس حوالے سے تمام تر خبروں کو بے بنیاد قرار دیا ہے۔
خیال رہے کہ اس سے قبل خبر سامنے آئی تھی پی سی بی ون ڈے کیلئے محمد رضوان کی جگہ سلمان علی آغا اور ٹیسٹ میچوں میں شان مسعود کی جگہ سعود شکیل کو سینٹرل کنٹریکٹ میں اے کیٹگری دے کر کپتان بنانے پر غور کر رہا ہے۔
