شارجہ: (ویب ڈیسک) متحدہ عرب امارات کرکٹ ٹیم کے کپتان محمد وسیم نے بھارتی ٹی 20 ٹیم کے سابق کپتان روہت شرما کا اہم ریکارڈ توڑ دیا۔
محمد وسیم نے شارجہ کرکٹ سٹیڈیم میں افغانستان کے خلاف سہ ملکی سیریز کے میچ کے دوران بھارت کے روہت شرما کو پیچھے چھوڑتے ہوئے ٹی 20 انٹرنیشنلز میں کپتان کی حیثیت سے سب سے زیادہ چھکے مارنے کا اعزاز حاصل کر لیا۔
وسیم نے افغانستان کے 189 رنز کے ہدف کے جواب میں شاندار بیٹنگ کا مظاہرہ کرتے ہوئے صرف 37 گیندوں پر 67 رنز کی طوفانی اننگز کھیلی جس میں 6 بلند و بالا چھکے اور 4 چوکے شامل تھے۔
یو اے ای کے کپتان نے محض 54 ٹی 20 انٹرنیشنل اننگز میں 110 چھکے مارے ہیں جبکہ روہت شرما نے بحیثیت کپتان 62 اننگز میں 105 چھکے مارے تھے۔
محمد وسیم نے اپنی دھواں دھار بیٹنگ کے ساتھ نیوزی لینڈ کے سابق اوپنر مارٹن گپٹل کو بھی پیچھے چھوڑ دیا اور ٹی 20 انٹرنیشنلز میں سب سے زیادہ چھکے مارنے والے بیٹرز کی فہرست میں دوسرے نمبر پر آگئے ہیں۔
ٹی 20 انٹرنیشنلز میں سب سے زیادہ چھکے مارنے کا ریکارڈ اب بھی روہت شرما کے پاس ہے جنہوں نے 159 میچز میں 205 چھکے مارے جبکہ یو اے ای کے محمد وسیم نے 80 میچز میں 176 چھکے مارے ہیں۔
واضح رہے کہ محمد وسیم کی شاندار اننگز کے باوجود یو اے ای افغانستان کے 189 رنز کے ہدف کا تعاقب کرنے میں ناکام رہی اور مقررہ 20 اوورز میں 150 رنز بنا سکی اور 38 رنز سے شکست کھا گئی۔
