دبئی: (دنیا نیوز) متنازعہ ریفری اینڈی پائیکرافٹ پاک بھارت میچ میں دوبارہ ذمہ داریاں نبھائیں گے۔
ایشیا کپ کے دوران گروپ میچ میں تنازع کا سبب بننے والے میچ ریفری اینڈی پائیکرافٹ کو ایک بار پھر پاکستان اور بھارت کے درمیان سپر فور مرحلے کے اہم میچ کے لیے ریفری مقرر کیا گیا ہے۔
کرک انفو کی رپورٹ کے مطابق یہ میچ اتوار 21 ستمبر کو دبئی میں کھیلا جائے گا۔
یاد رہے کہ 14 ستمبر کو کھیلے گئے گروپ میچ میں بھارت نے پاکستان کو با آسانی شکست دی تھی اور اسی میچ میں ہاتھ نہ ملانے کا تنازع سامنے آیا تھا۔
ٹاس کے موقع پر دونوں ٹیموں کے کپتانوں نے ایک دوسرے سے مصافحہ نہیں کیا تھا، جس پر بعد میں پاکستان ٹیم کے کوچ نے انکشاف کیا کہ میچ ریفری اینڈی پائیکرافٹ نے پاکستانی کپتان سلمان آغا کو بھارتی کپتان سے ہاتھ نہ ملانے کا مشورہ دیا تھا۔
اس واقعے پر پاکستان کرکٹ بورڈ (پی سی بی) نے سخت احتجاج کیا تھا اور آئی سی سی سے مطالبہ کیا تھا کہ اینڈی پائیکرافٹ کو مستقبل کے میچز میں ذمہ داریاں نہ دی جائیں۔
اس کے علاوہ پی سی بی نے متحدہ عرب امارات کے خلاف میچ کا بائیکاٹ کرنے کی دھمکی بھی دی تھی۔
بعد ازاں اینڈی پائیکرافٹ نے پاکستانی کپتان سے معافی مانگ لی، جس کے بعد پاکستان نے متحدہ عرب امارات کے خلاف میچ میں شرکت کی، جس میں اینڈی پائیکرافٹ ہی ریفری تھے۔
سپر فور مرحلے کے اس اہم میچ سے قبل پاکستان ٹیم نے اپنی پریس کانفرنس منسوخ کر دی اور کھلاڑیوں کی ذہنی تیاری کو بہتر بنانے کے لیے ایک ماہر نفسیات کی خدمات بھی حاصل کر لی گئی ہیں۔
