کولمبو: (دنیا نیوز) ویمنز ورلڈ کپ میں جنوبی افریقا نے ڈی ایل ایس میتھڈ کے تحت پاکستان کو 150 رنز کے بھاری مارجن سے شکست دے کر میگا ایونٹ سے باہر کردیا۔
بارش کے متاثرہ میچ میں پاکستان کو 20 اوورز میں 234 رنز کا ہدف ملا جس کے تعاقب میں قومی ٹیم 7 وکٹوں کے نقصان پر 83 رنز بناسکی، سدرہ نواز 22 رنز بنا سکیں، نتالیہ پرویز 20 اور سدرہ امین 13 رنز بناسکیں جبکہ دیگر کوئی کھلاڑی ڈبل فگر میں داخل نہ ہوسکیں۔
جنوبی افریقا کی جانب سے میری زین کیپ نے تین کھلاڑیوں کو آؤٹ کیا، شانگسے نے 2 وکٹیں حاصل کیں۔
قبل ازیں کولمبو میں کھیلے جانیوالے میچ میں جنوبی افریقا نے پہلے بیٹنگ کرتے ہوئے 40 اوور میں 312 رنز بنائے تھے، میری زین کیپ کو 68 رنز کی اننگز کھیلنے اور تین وکٹیں حاصل کرنے پر بہترین کھلاڑی قرار دیا گیا۔
کپتان لورا ولوردت نے 90 رنز کی اننگز کھیلی، سونی لوس 61 رنز بنا کر نمایاں رہیں۔
پاکستان کی جانب سے سعدیہ اقبال اور نشرہ سندھو نے تین، تین کھلاڑیوں کو آؤٹ کیا تھا۔
