گوجرانوالہ: (دنیا نیوز) فیڈرل انویسٹی گیشن ایجنسی (ایف آئی اے) گوجرانوالہ نے 4 انسانی سمگلرز سمیت 5 ملزمان کو گرفتار کر لیا۔
ترجمان کے مطابق ایف آئی اے گوجرانوالہ زون نے کارروائی کر کے سمندر کے راستے شہریوں کو موریطانیہ سے یورپ بھجوانے میں ملوث 4 انسانی سمگلرز سمیت 5 ملزمان کو منڈی بہاؤالدین کے مختلف علاقوں سے گرفتار کیا، گرفتار ملزمان کی شناخت منور حسین، قمر عباس، حافظ شاہد، محمد طاہر اور ساجد حسین کے نام سے ہوئی۔
حکام کا کہنا ہے کہ ملزم منور حسین، قمر عباس، حافظ شاہد اور محمد طاہر شہریوں کو سمندر کے راستے سپین بھجوانے میں ملوث ہیں، ملزمان کی جانب سے متاثرین کو پہلے وزٹ ویزے پر موریطانیہ بھجوایا گیا، ملزمان نے متاثرین کو کشتی کے ذریعے موریطانیہ سے سپین سمگلنگ کی کوشش کی۔
شہریوں نے کشتی کے ذریعے سفر کرنے سے انکار کر دیا اور وطن واپس آ گئے، ملزمان نے متاثرین سے بیرون ملک بھجوانے کیلئے فی کس 25 لاکھ سے 40 لاکھ روپے ہتھیائے، متاثرین کا تعلق منڈی بہاؤالدین کے علاقے ککھ تراڑ اور منگٹ سے ہے۔
دوسری جانب ملزم ساجد حسین (صائم ٹریول اینڈ ٹورز) کے نام سے غیر قانونی ٹریول ایجنسی چلا رہا تھا، چھاپہ مار کارروائی میں ملزم سے 10 پاسپورٹس اور موبائل فون برآمد کر لئے گئے، ملزم برآمد ہونے والے پاسپورٹس کے حوالے سے حکام کو مطمئن نہ کر سکا۔
ایف آئی اے حکام کے مطابق ملزمان کو گرفتار کر کے تفتیش کا آغاز کر دیا گیا ہے۔
