مظفرآباد : ( محمد اسلم میر) راو لاکوٹ کے علاقے ڈھلکوٹ میں دو گروپوں کے درمیان فائرنگ کے تبادلہ میں مقامی پولیس افسر جاں بحق ہو گیا۔
پولیس کا کہنا تھا کہ پولیس چوکی دھلکوٹ کے انچارج اسسٹنٹ سب انسپکٹر عبدالرؤف کو اطلاع ملی کہ ڈھلکوٹ میں پٹرول پمپ کی ملکیت کے حوالے سے پرانے تنازع پر دو گروپوں کے درمیان تصادم ہو گیا ہے ، تصادم کی اطلاع ملتے ہی اسسٹنٹ سب انسپکٹر چوکی آفیسر نفری کے ہمراہ موقع پر پہنچے۔
اسی اثنا میں پٹرول پمپ پر دو گروپوں کے درمیان بحث اور شدید تکرار کے بعد فائرنگ کا تبادلہ ہوا جس میں مقامی پولیس افسر اسسٹنٹ سب انسپکٹر عبدالرؤف جاں بحق ہو گئے، عبدالرؤف کو دو گولیاں لگی تھیں جسے ان کی موت واقع ہو ئی ہے۔
پولیس ترجمان کی جانب سے بتایا گیا ہے کہ اسسٹنٹ سب انسپکٹر عبدالروف کی نماز جنازہ گزشتہ رات پولیس لائن راولاکوٹ میں ادا کی گئی جبکہ آج اتوار کو ان کے آبائی گاؤں اکھوڑ بن ہجیرہ میں بھی نماز جنازہ ادا کی جائے گی ، نماز جنازہ کے بعد انہیں آبائی قبرستان میں سپرد خاک کیا جائے گا۔
وزیر اعظم آزاد جموں و کشمیر چودھری انوار الحق نے واقعہ پر افسوس کا اظہار کرتے ہوئے کہا کہ اس قتل میں ملوث لوگوں کو بر وقت گرفتار کیا جائے۔
