کراچی: (دنیا نیوز) سندھ ہائیکورٹ نے معروف اداکار ساجد حسن کے بیٹے ساحر حسن کی ضمانت کی درخواست ریگولر بنچ کو بھیجنے کی ہدایت کردی۔
رپورٹ کے مطابق سندھ ہائیکورٹ کے آئینی بنچ نے منشیات برآمدگی کیس میں گرفتار ملزم ساحر حسن کی ضمانت کی درخواست پر سماعت کی، عدالت نے ریمارکس دیئے کہ یہ معاملہ ریگولر کورٹ کے دائرہ اختیار میں آتا ہے لہٰذا درخواست کو ریگولر بنچ کے روبرو پیش کیا جائے۔
عدالت نے کیس کی سماعت ملتوی کرتے ہوئے متعلقہ بنچ کو 14 روز میں مسئلہ حل کرنے کی ہدایت بھی کی، وکیل درخواست گزار نے مؤقف اختیار کیا کہ ملزم عدالتی ریمانڈ پر جیل میں ہے اور اس پر منشیات برآمدگی کا الزام عائد کیا گیا ہے۔
پولیس کے مطابق ساحر حسن کو 22 فروری کو ڈیفنس ہاؤسنگ اتھارٹی (ڈی ایچ اے) فیز 6 سے گرفتار کیا گیا تھا اور اس کے قبضے سے 5 پیکٹ ویڈ (گانجا) برآمد ہوا تھا۔
عدالت نے مزید ہدایت دی کہ کیس کو جلد نمٹانے کے لیے ضروری کارروائی مکمل کی جائے، درخواست گزار کی ضمانت کے حوالے سے حتمی فیصلہ ریگولر بنچ کرے گا۔
