کراچی: (دنیا نیوز) اینٹی نارکوٹکس فورس (اے این ایف) نے کارروائیوں کے دوران 8 کروڑ سے زائد کی منشیات برآمد کر کے 3 ملزمان گرفتار کر لئے۔
اے این ایف کا ملک کے مختلف شہروں میں منشیات سمگلنگ کے خلاف کریک ڈاؤن کا سلسلہ جاری ہے۔
ترجمان اے این ایف کے مطابق مختلف شہروں میں 7 کارروائیوں کے دوران 8 کروڑ 72 لاکھ سے زائد مالیت کی 208.643 کلو گرام منشیات برآمد کر کے 3 ملزمان کو حراست میں لے لیا گیا ہے۔
حکام کا کہنا ہے کہ کراچی پورٹ سے دبئی جانے والی کھیپ میں مصالحے کے پیکٹس سے 164.160 کلو آئس، کوئٹہ میں کوریئر آفس سے آسٹریلیا بھیجے جانے والے پارسل سے 5 کتابوں میں جذب شدہ 4.6 کلو آئس برآمد ہوئی جبکہ راولپنڈی میں کوریئر آفس میں برطانیہ بھیجے جانے والے پارسل سے 1 کلو ہیروئن برآمد کی گئی۔
ترجمان کے مطابق پشاور انٹرنیشنل ایئرپورٹ پر جدہ جانے والے مسافر کے سامان میں موجود سلائی مشین میں چھپائی گئی 1.887 کلو آئس پکڑی گئی، راولپنڈی میں واقع کوریئر آفس میں ایک اور کارروائی میں دوحہ بھیجے جانے والے پارسل سے 2 عدد کمپیوٹر ٹیبل میں چھپائی گئی 996 گرام آئس ملی ہے۔
اس کے علاوہ ملتان روڈ لاہور پر بس ٹرمینل کے قریب مسافر کے ٹرالی بیگ سے 30 کلو چرس برآمد ہوئی جبکہ حیدرآباد میں جامشورو کے قریب بس میں سوار ملزم سے 5 کلو چرس اور 1 کلو آئس پکڑی گئی ہے۔
ترجمان کا کہنا ہے کہ گرفتار ملزمان کیخلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
