کراچی: (دنیا نیوز) کراچی کے علاقے لیاری میں رینجرز اور محکمہ انسداد دہشتگردی (سی ٹی ڈی) نے مشترکہ کارروائی کرتے ہوئے دہشت گردی کی متعدد وارداتوں میں ملوث کالعدم تنظیم سے تعلق رکھنے والے انتہائی مطلوب دہشتگرد اختر کو گرفتار کر لیا۔
رینجرز ترجمان نے بتایا کہ اختر عرف اکو انتہائی مطلوب ملزم تھا جس کے قبضے سے اسلحہ و بارود بھی برآمد کر لیا گیا، 2019 میں ملزم اپنے قریبی ساتھی فراز عرف گنج کے کہنے پر کالعدم تنظیم میں شامل ہوا تھا۔
ترجمان رینجرز کے مطابق ملزم اپنے ساتھی فراز کے ساتھ ملکر متعدد حساس مقامات کی ریکی کرنے اور ویڈیوز بنانے میں ملوث رہا ہے، ملزم نے انکشاف کیا کہ 9 مارچ 2021 کو اس نے اپنے ساتھی فراز کے ساتھ مل کر لیاری میں چینی شہریوں کی گاڑی پر فائرنگ کی واردات کی تھی۔
اس فائرنگ کے واقعے میں چینی منیجر جیسن اور را ہگیر خالد زخمی ہوئے تھے جس کی ایف آئی آر تھانہ بغدادی میں درج ہے اور ملزمان کو سی سی ٹی وی فوٹیج میں واضح طور پر دیکھا جاسکتا ہے۔
ملزم نے مزید انکشاف کیا کہ وہ اپنے ساتھی فراز عرف گنج کے ہمراہ حب چوکی میں صحافی اکرم ساجدی اور شاہد زہری کی ریکی کرنے اور ویڈیوز بنا کر کالعدم بلوچستان لبریشن فرنٹ (بی ایل ایف) کے کمانڈر عبد الرحمٰن عرف عدنان عرف ڈیوڈ کو بھجوانے میں ملوث ہے۔
10 اکتوبر 2021 کو بی ایل ایف کے دہشت گردوں نے حب چوکی کے علاقے میں شاہد زہری کی گاڑی پر مقناطیسی بم نصب کر کے بلاسٹ کیا تھا جس کےنتیجے میں شاہد زہری جاں بحق جبکہ 2 افراد شدید زخمی ہوئے تھے۔
یکم نومبر 2021 کو بی ایل ایف کے دہشت گردوں نے حب چوکی کے علاقے میں صحافی اکرم ساجدی کی گاڑی پر مقناطیسی بم نصب کر کے بلاسٹ کیا تھا جس میں صحافی اکرم ساجدی جان کی بازی ہار گیا تھا، ملزم سے مزید اہم انکشافات متوقع ہیں۔
رینجرز ترجمان نے بتایا کہ گرفتار ملزم کو بمعہ اسلحہ و ایمونیشن مزید قانونی کارروائی کے لیے سی ٹی ڈی پولیس کے حوالے کر دیا گیا ہے۔
ترجمان نے عوام الناس سے اپیل کی کہ ایسے جرائم پیشہ عناصر کے بارے میں اطلاع فوری طور پر قریبی رینجرز چیک پوسٹ، رینجرز مدد گار بذریعہ واٹس ایپ نمبر 0347900111 ’یا‘ رینجرز ہیلپ لائن 1101 پر کال کرکے دیں ’یا‘ ایس ایم ایس کے ذریعے دیں، آپ کا نام صیغہ راز میں رکھا جائے گا۔
