لاہور: (دنیا نیوز) لاہور میں مذہبی جماعت کے رہنما حاجی نواز کی گاڑی پر فائرنگ کے نتیجے میں بیٹا جاں بحق جبکہ خاتون سمیت 5 افراد زخمی ہوگئے۔
پولیس کے مطابق فائرنگ کا واقعہ سندر میں جلیانہ گاؤں میں پیش آیا، زخمیوں میں حاجی نواز، ان کی اہلیہ، بیٹا، بھائی اور دو گن مین شامل ہیں، تمام زخمیوں کو فوری طور پر جناح ہسپتال منتقل کر دیا گیا ہے۔
تاہم فائرنگ میں زخمی ہونے والا 20 سالہ نوجوان جانبر نہ ہوسکا اور ہسپتال میں دم توڑ گیا، مقتول ندیم کو 4 گولیاں لگیں۔
واضح رہے کہ مذہبی جماعت کے رہنما حاجی نواز پی پی 166 سے صوبائی اسمبلی کا الیکشن بھی لڑ چکے ہیں۔
ادھر واقعے کا نوٹس لیتے ہوئے ڈی آئی جی آپریشنز فیصل کامران نے فوری کارروائی کی ہدایت کر دی، جس کے بعد پولیس نے واقعہ کا مقدمہ درج کر کے ملزمان کو گرفتار کر لیا، گرفتار ملزمان میں طاہر عباس، علی مرتضیٰ اور محمد رستم حیات شامل ہیں۔
ڈی آئی جی آپریشنز کی ہدایت پر ایس پی صدر ڈاکٹر غیور احمد نے جناح ہسپتال کا دورہ کیا، جہاں انہوں نے زخمیوں کی عیادت کی اور واقعے کے حوالے سے تفصیلات حاصل کیں۔
پولیس کا کہنا ہے کہ گرفتار ملزمان سے مزید تفتیش جاری ہے اور قانون کے مطابق سخت کارروائی عمل میں لائی جائے گی۔
