کراچی: (دنیا نیوز) اینٹی نارکوٹکس فورس (اے این ایف) نے تعلیمی اداروں اور ملک کے مختلف شہروں میں منشیات سمگلنگ کے خلاف کریک ڈاؤن کرتے ہوئے 7 ملزمان گرفتار کر لئے۔
ترجمان اے این ایف کے مطابق کارروائیوں میں 1 کروڑ 15 لاکھ سے زائد مالیت کی 45.956 کلو منشیات برآمد ہوئیں، اسلام آباد آئی جے پی روڈ کے قریب کارروائی کرتے ہوئے پشاور کے رہائشی 2 ملزمان سے 20 کلو آئس برآمد ہوئی۔
برآمد شدہ منشیات موٹرسائیکل کارٹ میں مہارت سے چھپائی گئی تھی، گرفتار ملزمان نے تعلیمی اداروں میں طلبہ کو منشیات فروخت کرنے کا اعتراف بھی کیا۔
ترجمان نے بتایا کہ اسلام آباد ٹھلیاں ٹول پلازہ کے قریب صوابی کے رہائشی ملزم اور کراچی کی 2 خواتین سے مجموعی طور پر 24 کلو چرس برآمد ہوئی، قلندرآبار روڈ ایبٹ آباد کے قریب چترال کے رہائشی ملزم سے 1 کلو 800 گرام چرس برآمد کی گئی۔
اس کے علاوہ ملتان انٹرنیشنل ایئرپورٹ پر اے این ایف اور اے ایس ایف نے مشترکہ کارروائی کرتے ہوئے ملزم کی گاڑی سے 156 گرام نشہ آور گولیاں برآمد کیں، ڈی جی خان کا رہائشی ملزم گرفتار کر کے مقدمات درج کرتے ہوئے تحقیقات کا آغاز کر دیا گیا۔
