نوشکی: (دنیا نیوز) بلوچستان کے ضلع نوشکی سے ملنے والی 4 لاشوں کی شناخت ہوگئی۔
لیویز حکام کے مطابق نوشکی کے علاقے گلنگور سے منگل کی دوپہر چار افراد کی لاشیں برآمد ہوئیں، لاشوں کو ضابطے کی کارروائی کے لیے ٹیچنگ ہسپتال نوشکی منتقل کیا گیا۔
حکام نے بتایاکہ اسپتال میں مقتولین کی شناخت پنجاب کے رہائشیوں کے طور پر کر لی گئیں جن میں معین اور حذیفہ کا تعلق پنجاب کے علاقے پاکپتن جبکہ دو بھائیوں عمران علی اور عرفان علی کا تعلق رحیم یار خان سے ہے۔
لیویز حکام کے مطابق مقتولین گیس باؤزر کے ڈرائیور اور کلینر تھے، انہیں چندروز قبل نوشکی میں احمد وال کے قریب سے اغوا کیا گیا تھا، لیویز حکام کے مطابق واقعے کی تحقیقات کا آغاز کر دیا گیا ہے۔
دوسری جانب ترجمان حکومت بلوچستان شاہد رند نے نوشکی میں 4افراد کے بہیمانہ قتل کی مذمت کرتے ہوئے واقعہ انسانیت سوز اور قابل افسوس قرار دیا، انہوں نے کہا کہ حکومت قاتلوں کی گرفتاری کیلئے تمام وسائل بروئے کار لا رہی ہے۔
