کراچی: (ویب ڈیسک) شہر قائد میں دو مبینہ پولیس مقابلوں میں ایک ڈاکو مارا جبکہ چار کو گرفتار کر لیا گیا۔
پہلا واقعہ شمالی کراچی کے علاقے شادمان ٹاؤن شارع نور جہاں تھانے کی حدود میں پیش آیا، جہاں مبینہ پولیس مقابلے میں ایک ڈاکو ہلاک اور دوسرا زخمی حالت میں پکڑا گیا، پولیس کے مطابق ہلاک ڈاکو کی شناخت مظفر علی مگسی جبکہ زخمی ملزم کی شناخت اعجاز کے نام سے ہوئی ہے، پولیس نے ملزموں کے قبضے سے اسلحہ، موبائل فونز اور موٹرسائیکل برآمد کر لی ہے۔
دوسرا مقابلہ سرجانی ٹاؤن کے بھینس کالونی روڈ پر پیش آیا، جہاں مبینہ پولیس مقابلے کے بعد دو زخمی سمیت تین ملزمان کو گرفتار کیا گیا، زخمی ملزموں کو ہسپتال منتقل کر دیا گیا جہاں ان کی شناخت محمد عظیم اور جاوید کے نام سے ہوئی، جبکہ تیسرے ملزم نے اپنا نام بلال احمد بتایا۔
پولیس کے مطابق گرفتار ملزمان کے قبضے سے دو پستولیں، آٹھ چھینے گئے موبائل فون اور ایک موٹرسائیکل برآمد ہوئی ہے، تمام گرفتار ملزمان سے مزید تفتیش جاری ہے اور ان کے کریمنل ریکارڈ کی بھی جانچ کی جا رہی ہے۔
