ڈی آئی خان، ٹانک: (دنیا نیوز) ڈیرہ اسماعیل خان اور ٹانک میں فائرنگ کے دو مختلف واقعات میں 6 افراد کو قتل کر دیا گیا۔
پولیس حکام کے مطابق ڈیرہ اسماعیل خان کی تحصیل پہاڑپور کے علاقے رحمانی خیل میں دیرینہ دشمنی ایک بار پھر خونریز تصادم میں بدل گئی، جہاں دو مخالف گروپوں کے درمیان رات 3 بجے کے قریب شدید فائرنگ کا تبادلہ ہوا، جس کے نتیجے میں ایک گروپ کے 3 افراد جاں بحق ہوگئے۔
واقعہ تھانہ پنیالہ کی حدود میں پیش آیا، جہاں دشمنی کی بنا پر دونوں گروپ آمنے سامنے آ گئے اور فائرنگ شروع ہو گئی، جاں بحق ہونے والوں میں نعمت اللہ، محمد سلیم اور زاہد شامل ہیں، جن کی نعشیں قانونی کارروائی کیلئے ہسپتال منتقل کر دی گئی ہیں۔
واقعے کی اطلاع ملتے ہی پولیس کی بھاری نفری موقع پر پہنچ گئی اور علاقے کو گھیرے میں لے لیا، حالات کو قابو میں رکھنے کیلئے سکیورٹی سخت کر دی گئی ہے جبکہ فریقین کے خلاف مقدمہ درج کر کے تفتیش کا آغاز کر دیا گیا ہے۔
پولیس کا کہنا ہے کہ واقعے کی مکمل چھان بین جاری ہے اور مزید کارروائی قانون کے مطابق عمل میں لائی جائے گی۔
دوسری جانب خیبرپختونخوا کے ضلع ٹانک کے گاؤں ملازئی میں مسلح افراد نے گھر میں گھس کر اندھا دھند فائرنگ کر دی، جس کے نتیجے میں دو بھائیوں سمیت تین افراد جان کی بازی ہار گئے۔
جاں بحق افراد کی شناخت سردار احمد اور اعزاز احمد پسران گل احمد قوم مروت سکنہ ملازئی اور ان کے دوست عمران ولد گل بادشاہ سکنہ لکی مچن خیل کے ناموں سے ہوئی ہے۔
پولیس حکام کے مطابق قتل کی وجہ عداوت مقتولین کی علاقہ میں قتل مقاتلہ کی دشمنی تھی۔
حکام کا کہنا ہے کہ واقعے کے بعد نعشوں کو ضابطے کی کارروائی کیلئے ڈسٹرکٹ ہسپتال ٹانک منتقل کر دیا گیا، پولیس نے مقدمہ درج کر کے واقعہ کی تحقیقات کا آغاز کر دیا ہے۔
