کراچی: (دنیا نیوز) کراچی میں ڈکیتی کے دوران مزاحمت پر سعودی عرب سے والد کے انتقال کے بعد تدفین کیلئے آیا ہوا نوجوان ڈاکوؤں کی فائرنگ سے جاں بحق ہوگیا۔
پولیس حکام کا کہنا ہے کہ کراچی کے علاقے اورنگی ٹاؤن میں ڈکیتی کے دوران مزاحمت کرنے پر فائرنگ سے جاں بحق ہونے والے شخص کی شناخت جبران کے نام سے ہوئی ہے، موٹرسائیکل سوار 2 ملزمان نے مقتول سے لوٹ مار کی اور مزاحمت کرنے پر گولیاں مار دیں۔
پولیس کے مطابق فائرنگ کے بعد ملزمان فرار ہوگئے، نوجوان کی نعش ہسپتال منتقل کر دی گئی۔
مقتول کے اہل خانہ کے مطابق وہ سعودی عرب میں ملازمت کرتا تھا اور چند روز قبل ہی اپنے والد کے انتقال کی خبر ملنے پر تدفین کے سلسلے میں کراچی آیا ہوا تھا۔
دوسری جانب اورنگی ٹاؤن گلشن بہار میں مبینہ پولیس مقابلے میں ایک ڈاکو کو زخمی حالت میں گرفتار کر لیا گیا، جبکہ اس کا ساتھی فرار ہوگیا، گرفتار ملزم سے اسلحہ اور موٹرسائیکل برآمد ہوئی ہے۔
