مظفر گڑھ: (دنیا نیوز) پنجاب پولیس کی مظفرگڑھ کے کچے میں بڑی کامیابی، علی پور کے کچہ میں کارروائی کے دوران کچہ ڈکیت گینگ نے 100 چھینے گئے جانوروں سمیت خود کو سرنڈر کر دیا۔
ترجمان پنجاب پولیس کے مطابق ہتھیار ڈالنے والے ڈاکوؤں میں قلندر بوسن، اللہ نواز بوسن، شہزاد بوسن، فیض رسول بوسن اور ساجد بوسن شامل ہیں۔
مظفرگڑھ پولیس کے ساتھ ایک ہفتہ شدید مقابلے، مزاحمت میں ناکامی کے بعد کچہ گینگ نے ہتھیار ڈالنے کا فیصلہ کیا، ابتدائی طور گینگ کے 5 اہم کارندوں نے اسلحہ سمیت خود کو سرنڈر کیا۔
ترجمان پنجاب پولیس کے مطابق گینگ ممبران نے جرائم کی دنیا سے توبہ بھی کر لی، گینگ ممبران نے 4 کلاشنکوف، 2 رپیٹر بھی پولیس کے حوالے کر دیئے۔
پولیس ہتھیار ڈالنے والے ڈاکوؤں پر دہشت گردی، قتل، اقدام قتل، ڈکیتی و راہزنی جیسے درجنوں مقدمات درج ہیں۔
ڈی پی او مظفرگڑھ ڈاکٹر رضوان خان نے بازیاب 100 مویشی مڈ سونہارے شاہ میں اصل مالکان کے حوالے کر دیئے۔
ترجمان پنجاب پولیس کے مطابق آئی جی پنجاب ڈاکٹر عثمان انور نے کچہ کریمنلز کے خلاف شاندار کامیابی پر مظفرگڑھ پولیس کو شاباش دی۔
