اسلام آباد: (دنیا نیوز) کابینہ کمیٹی نے کچے کے علاقے میں آپریشنز کیلئے 1 ارب روپے کے فنڈز سے ضروری و جدید آلات کی خریداری کی منظوری دے دی۔
محکمہ داخلہ پنجاب میں کابینہ کمیٹی برائے امن و امان کا 33 واں اجلاس ہوا، صوبائی وزیر صحت و چیئرمین کابینہ کمیٹی برائے امن و امان خواجہ سلمان رفیق نے اجلاس کی صدارت کی، اجلاس میں صوبائی وزراء ملک صہیب احمد بھرتھ اور چوہدری شافع حسین نے خصوصی طور پر شرکت کی۔
کابینہ کمیٹی کے اجلاس کے دوران صوبہ بھر کی سکیورٹی کی تازہ صورتحال کا تفصیلی جائزہ لیا گیا، سیکرٹری داخلہ ڈاکٹر احمد جاوید قاضی اور قانون نافذ کرنے والے اداروں نے اس حوالہ سے بریفنگ بھی دی۔
اجلاس میں عشرہ محرم الحرام کے دوران محکمہ داخلہ اور قانون نافذ کرنے والے اداروں کی کارکردگی کی کارکردگی کو سراہا گیا، کابینہ کمیٹی نے اٹک اور ڈی جی خان میں رینجرز کے 1، 1 ونگ کی تعیناتی کی منظوری دے دی، میانوالی میں رینجرز کی تعیناتی میں 3 ماہ کی توسیع دے دی گئی۔
اجلاس کے دوران کچے کے علاقہ میں پولیس کو وسائل کی فراہمی بارے تجاویز زیر غور آئیں کچے کے علاقے میں آپریشنز کیلئے نئی ٹریک اے پی سیز کی منظوری دے دی گئی۔
صوبائی وزیر محکمہ صحت و چیئرمین کابینہ کمیٹی برائے امن و امان خواجہ سلمان رفیق نے کہا کہ پنجاب بھر میں عوام کے جان و مال کا تحفظ یقینی بنایا جا رہا ہے، کچے کے علاقے میں آپریشنز کی کامیابی کیلئے پولیس کو تمام وسائل فراہم کر رہے ہیں۔
انہوں نے کہا کہ ہمارے تحفظ کیلئے اپنی جانوں کا نذرانہ پیش کرنے والے اہلکار ہمارے محسن اور قومی ہیرو ہیں۔
خواجہ سلمان رفیق نے کہا کہ بلوچستان سے واپس آتے ہوئے پنجاب سے تعلق رکھنے والے 9 بے گناہ شہریوں کو شہید کر کے درندگی کا مظاہرہ کیا گیا، تمام شہدا کے اہل خانہ سے رابطے میں ہیں اور قانون کے مطابق بھرپور امداد فراہم کر رہے ہیں۔
انہوں نے کہا کہ محرم الحرام کے دوران سوشل میڈیا پر فرقہ واریت پھیلانے والوں کو قانون کے شکنجے میں لانے پر محکمہ داخلہ کا کردار لائق تحسین ہے۔
اس موقع پر صوبائی وزیر محمد صہیب احمد برتھ نے کہا کہ کچے کے علاقہ میں پولیس کو جدید سامان کی ٹریننگ بھی کروائی جائے گی، پنجاب پولیس کو جدید اسلحہ سے لیس کرنا وقت کی اہم ضرورت ہے۔
