کراچی: (روزنامہ دنیا) رنگریزہ میں شاندار اداکاری سے شہرت پانے والے اداکار بلال عباس خان اور الف اللہ اور انسان میں بہترین اداکاری کے جوہر دکھانے والی اشنا شاہ بگ بینگ انٹرٹینمنٹ کے نئے ڈرامے ’’بلا‘‘ میں منفرد کردار نبھائیں گے۔
بگ بینگ انٹر ٹینمنٹ جو فہد مصطفی اور ڈاکٹر علی کاظمی کاباہمی پروڈکشن ہائوس ہے، کے تحت بننے والے ڈرامے "بلا" کی ہدایات زنجبیل عاصم شاہ نے دی ہیں جبکہ سٹار کاسٹ میں ساجد حسن، ثمینہ پیرزادہ، اسد صدیقی اور مہر بانوشامل ہیں۔ فہد مصطفی اور ڈاکٹر علی کاظمی کا نام پروڈکشن کے حوالے سے کسی تعارف کا محتاج نہیں، ان کے پیش کردہ معروف ڈراموں میں دوسری بیوی، رنگ لاگا، زندہ درگور، مقابل، انداز ِ ستم اور تیری رضا شامل ہیں۔
مذکور ہ پروڈکشن ہائوس کی پیشکش "مبارک ہو بیٹی ہوئی ہے "سے بگ بینگ انٹر ٹینمنٹ نے نصف سنچری مکمل کر کے شائقین میں بے حد مقبولیت حاصل کر لی ہے۔ اس سال کے متوقع ڈرامے "بلا" کی تمام تر تیاریاں مکمل کر لی گئی ہیں، ان کا کہنا ہے کہ معیاری ڈرامے ہماری ترجیحات میں شامل ہیں۔ معاشرتی مسائل کو ڈراموں میں پیش کر کے ناظرین کو آگاہی دے رہے ہیں۔
