وینس (دنیا نیوز ) اٹلی کے شہر وینس میں جاری سب سے پرانے فلمی میلے میں امریکی اداکارہ "ایما اسٹون" کی ریڈ کارپٹ پر آمد نے ان کے مداحوں کے دل جیت لیے۔ وہ فلم"دی فیورٹ " کی کاسٹ کے ہمراہ میلے میں شریک ہوئیں۔
ایما اسٹون معروف امریکی اداکارہ ہیں جو فلم " لالالینڈ" کی کامیابی سے شہرت کی بلندیوں پر پہنچیں، ایما سٹون کی وینس فلمی میلے میں آمد پر ان کے مداحوں کا جوش و خروش دیدنی تھا۔ وہ فلم" دی فیورٹ" کی کاسٹ کے ہمراہ ریڈ کارپٹ پر آئیں اور خوب تصاویر بنوائیں۔
ایما نے اپنے مداحوں کے ساتھ سیلفیاں بنوائیں اور ان کو آٹو گراف بھی دیئے، اس موقع پر برطانوی اداکار نکولس ہالٹ بھی لوگوں کی توجہ کا مرکز بنے رہے جو گلوکارہ ٹیلر سوئفٹ کے ساتھ دوستی کے لیے بھی مشہور ہیں۔
ایما سٹون نے فلم " دی فیورٹ" کے حوالے سے کہا کہ اس فلم میں کام کرنا ان کے لیے ایک بہترین تجربہ تھا۔ وینس فلم میلہ 9 ستمبر تک جاری رہے گا، جس میں 21 فلموں کے درمیان مقابلہ ہے۔
