لاہور: (دنیا نیوز) پاکستان فلم انڈسٹری کی معروف اداکارہ ریماخان کا کہنا ہے کہ اُنہیں زہر دینے کی کوشش کی گئی، اللہ نے انہیں بچایا۔
نجی ٹی وی سے خصوصی گفتگو کے دوران لالی ووڈ میں خود پر بیتنے والے حالات سے پردہ اٹھاتے ہوئے ریما نے کہا کہ فلم انڈسٹری میں کئی بار ہراساں کیا گیا، شٹ اپ کال دینے پر مجھے کئی فلموں سے نکالا گیا یا مناظر کاٹ دیے گئے۔ میرے اسکینڈلز بنوائےگئے حتیٰ کہ ایک بار میرے گھر پر فائرنگ بھی ہوئی۔
اداکارہ نے انکشاف کیا کہ بغض اور حسد کے باعث ایک اداکارہ نے انہیں زہر دینے کی سازش بھی کی لیکن جس اسسٹنٹ کو اس کام کیلئے پیسے دیے تھے ، اسی نے مجھے بتادیا۔ بعد میں صلح ہونے پر میں نے اس اداکارہ سے پوچھا بھی کہ ایسا کیوں کیا؟ میں نے تو کبھی اس انڈسٹری میں کسی کا برا نہیں چاہا۔
نجی ٹی وی کے نمائندے کی جانب سے استفسار پر ریما نے بردباری کا مظاہرہ کرتے ہوئے خود کو زہر دینے والی اداکارہ کا نام بتانے سے انکار کردیا۔
اداکارہ کا کہنا تھا کہ ایک بار شوکت خانم اسپتال کی فنڈ ریزنگ تقریب کے دوران میں نے ڈائس پر جا کر کہا کہ میرا کسی سیاسی جماعت سے تعلق نہیں لیکن شوکت خانم اسپتال کیلئے میں ہمیشہ حاضر ہوں جس پر عمران خان نے ڈائس پرآ کر مجھے ڈانٹا اور کہا کہ ’’جو سیاست میں نہیں وہ کچھ نہیں‘‘۔
ریما نے تفصیلات بتانے سے گریز کرتے ہوئے بس اتنا کہا کہ خان صاحب کے الفاظ بہت تلخ تھے جو میں نہیں بتاؤں گی۔
