لاہور: (ویب ڈیسک) پاکستانی اداکار حمزہ علی عباسی نے اپنے فیصلے پر یوٹرن لیتے ہوئے کہا ہے کہ دوبارہ اداکاری کی طرف آ سکتا ہوں۔
تفصیلات کے مطابق کئی مشہور فلموں اور ڈراموں میں اداکاری کے جوہر دکھانے والے حمزہ علی عباسی نے حال ہی میں سماجی رابطے کی ویب سائٹ ٹویٹر پر ٹویٹ کرتے ہوئے لکھا کہ اداکاری کو خیرباد نہیں کہا بلکہ ایک لمبے عرصے کے لیے شوبز سے بریک لیا ہے۔
بریک کی وجہ بیان کرتے ہوئے ان کا کہنا تھا کہ مذہب سے اپنا تعلق مضبوط کرنے کے لیے یہ اقدام اُٹھایا ہے اور مذہب کے دائرے میں رہتے ہوئے کسی نئے پروجیکٹ میں نظر آؤں گا۔
واضح رہے کہ گزشتہ سال نومبر میں حمزہ علی عباسی نے اعلان کیا تھا کہ وہ اسلام کا پیغام پھیلانے کے لیے شوبز چھوڑ رہے ہیں۔
اُنھوں نے اپنے وڈیو پیغام میں کہا تھا کہ اگر وہ کوئی دستاویزی فلم یا ڈرامہ بنائیں گے تو وہ بھی اسلام کے بارے میں ہی ہوگا۔ اس وڈیو پر سوشل میڈیا صارفین کی جانب سے کافی تبصرے کیے گئے تھے۔
تاہم اب حمزہ علی عباسی کا کہنا ہے کہ کنارہ کشی کا یہ مطلب نہیں ہے کہ وہ شوبز کو چھوڑ رہے ہیں۔
یہ بات اُنھوں نے اپنے ایک مداح کی ٹویٹ کے جواب میں کی، جس میں ان کی مداح نے کہا کہ کاش حمزہ علی اداکاری نہ چھوڑتے۔
گزشتہ سال ان کے فیصلے کے بعد ان پر کچھ حلقوں کی جانب سے تنقید ہوئی تو اس کے جواب میں ایک انٹرویو کے دوران ان کا کہنا تھا کہ میں نے شوبز انڈسڑی شہرت حاصل کرنے کے لیے نہیں چھوڑی۔
اُنھوں نے مزید کہا تھا کہ سرخیوں میں آنے کے لیے اس طرح کے کام نہیں کرتے ہیں کیونکہ انٹرٹینمنٹ انڈسڑی میں آنے کے بعد اُن کا ہر ڈرامہ اور فلم کامیاب رہی ہے۔ اسلام میں کسی بھی جگہ اداکاری کو حرام نہیں قرار دیا گیا۔
گزشتہ سال اگست میں حمزہ نے ماڈل و اداکارہ نیمل خاور سے نکاح کیا تھا۔ نکاح کی ایک چھوٹی سی تقریب اسلام آباد میں منعقد ہوئی تھی جس کے بعد سوشل میڈیا پر صارفین نے حمزہ علی عباسی کو کافی سراہا تھا۔
خیال رہے کہ حمزہ علی عباسی اس وقت الف ڈرامے میں نظر آرہیں ہیں۔ اس کے علاوہ ان کی نئی فلم دی لیجنٹذ آف مولا جٹ جلد بھی ریلز ہونے والی ہے۔ اس سے قبل حمزہ علی نے ’پرواز ہے جنون‘، ’یہ جاوانی پھر نہیں آنی‘ جیسی فلموں میں کام کیا ہے جو کہ کافی مشہور ہوئیں۔ اس کے علاوہ ’پیارے افضل‘، ’من مائل‘ اور دوسرے کئی ڈرامہ سیریلز میں بھی کام کر چکے ہیں۔
