لاہور: (ویب ڈیسک) ملک میں کرونا وائرس کے کیسز میں روز بروز اضافے کے پیشِ نظر اداکار اور میزبان فخرِ عالم نے وزیراعظم عمران خان سے ملک میں 2 ہفتے کے لیے لاک ڈاؤن کرنے کی اپیل کردی۔
سماجی رابطے کی ویب سائٹ ٹویٹر پر ٹویٹ کرتے ہوئے فخر عالم نے وزیراعظم عمران خان کے نام ویڈیو پیغام میں کہا کہ عمران بھائی جیسا کہ ہم سب جانتے ہیں کہ آپ کے دل میں انسانیت اور انسانوں اور غریبوں کے لیے کیا جگہ ہے۔ اس میں کوئی شک نہیں ہے آپ ایک نیک انسان ہیں، اور میں یہ بھی جانتا ہوں کہ اس وقت آپ کی حکومت کو سب سے بڑا چیلنج ہے۔
یہ بھی پڑھیں: کرونا وائرس سنجیدہ مسئلہ، ہمیں لاک ڈاؤن پر جانا چاہیے: علی ظفر
فخر عالم نے مزید لکھا کہ ایک پاکستانی ہونے کی حیثیت سے میری آپ سے ایک درخواست ہے میں غلط بھی ہوسکتا ہوں، ایک طرف سرکار یہ کہہ رہی ہے لوگ گھر میں رہیں، دفتر نہ جائیں، سماجی دوری اختیار کریں اور آپ نے بھی لوگوں سے یہ ہی اپیل کی اور اس کے نتیجے میں غریب طبقہ پہلے ہی متاثر ہے۔
Dear honorable PM @ImranKhanPTI sir it is a humble request to you please re consider. A lockdown before it’s too late. This Video is in two parts. I could be wrong & I know you are worried about social unrest but we can end up in a far worse place. #CoronaVirusPakistan pic.twitter.com/Tp8yRkpXAW
— Fakhr-e-Alam (@falamb3) March 20, 2020
ان کا کہنا تھا کہ حکومت نے آدھی پالیسی بنائی ہے کہ غریب طبقہ روزی کمانے کے لیے باہر نکل سکتا ہے لیکن باقی لوگ نہیں نکل سکتے ہیں، عمران خان میری آپ سے گزارش ہے کہ آدھی آدھی پالیسی رکھنے کے بجائے ایک پالیسی بنائیں۔
فخر عالم نے عمران خان کو دو ہفتوں کے لیے لاک ڈاؤن کا مشورہ دیتے ہوئے کہا کہ ان دو ہفتوں میں شہروں کے مختلف علاقوں میں راشن باٹنا شروع کردیں۔
ویڈیو میں فخر عالم کا مزید کہنا تھا کہ سماجی کارکنان کو دستانے وار ماسک فراہم کیے جائیں تاکہ وہ راشن کو ضرورت مندوں کے گھر منتقل کرسکیں، اس کے علاوہ والدین کو جو اس وقت اسکولوں کی فیسیں ادا کرنی پڑ رہی ہیں وہ بھی معاف کی جائیں کیونکہ کوئی بھی اس وقت کام پر نہیں جا رہا ہے۔
ان کا کہنا تھا کہ پاکستانیوں کو اگر چھٹیاں مل جائیں تو وہ پکنک پر نکل جاتے ہیں، اس لیے عمران خان ملک میں کرفیو لگائیں تاکہ جانی نقصان سے بچا جاسکے۔
