لاہور: (ویب ڈیسک) پاکستان کی مشہور اداکارہ نادیہ جمیل، جنہوں نے بریسٹ کینسر جیسی خطرناک بیماری کو شکست دی ہے، نے سوشل میڈیا پر خصوصی پیغام جاری کیا ہے۔
انسٹاگرام پر نادیہ جمیل نے ایک ویڈیو پوسٹ کی جس میں اداکارہ بریسٹ کینسر کو شکست دینے کے بعد ہسپتال سے ڈسچارج ہوکر اپنے گھر واپس جار ہی ہیں۔
ویڈیو پوسٹ کرتے ہوئے نادیہ جمیل نے انسٹا گرام پر لکھا کہ یہ وہ دن تھا کہ جب میں ہسپتال سے ڈسچارج ہوئی اور میں اپنی زندگی کے اِس خاص موقع پر اُن تمام لوگوں کی شکرگزار ہوں جنہوں نے اس مشکل وقت میں میرا ساتھ دیا اور میری صحتیابی کے لیے دُعا کی۔
اداکارہ نے لکھا کہ مجھے ہسپتال کا وہ تیسرا دن یاد ہے جب میں نے آخری الفاظ یہ سُنے تھے کہ ہمیں اِن کو کھو رہے ہیں۔
اُنہوں نے لکھا کہ مجھے دوران علاج کی اپنی تنہائی یاد ہے اور میں آج بھی وہ سب محسوس کرسکتی ہوں، مجھے یاد ہے کہ جب مجھے انجیکشنز اور ڈرپ لگتی تھیں تو مجھے بہت تکلیف ہوتی تھی اور پھر میں اللّہ تعالیٰ سے دُعا کرتی تھی کہ مجھے یہ سب برداشت کرنے کے لیے مضبوط بنا۔
نادیہ جمیل نے لکھا کہ اِس پورے عرصے کے دوران میں جب بھی اپنا فون اُٹھاتی تھی تو آپ سب کے محبت بھرے پیغامات دیکھ کر خوش ہوجاتی تھی اور مُسکرانے لگتی تھی۔
اُنہوں نے لکھا کہ میں واقعی بہت خوش قسمت ہوں کہ مجھے آپ سب کا پیار ملا، میں بھی آپ سے اُتنی ہی محبت کرتی ہوں جتنی آپ سب مجھ سے کرتے ہیں۔
