لاہور: (ویب ڈیسک) معروف اینکر پرسن مرحوم عامر لیاقت کے بچوں نے رمضان کی آمد پر والد کے نام جذباتی پیغام جاری کر دیا۔
عامر لیاقت حسین کی پہلی اہلیہ سیدہ بشریٰ اقبال نے دونوں بچوں کی جانب سے لکھے گئے پیغامات کو سوشل میڈیا پر مداحوں کے ساتھ شیئر کیا ہے۔
عامر لیاقت کے بیٹے احمد نے والد کے نام ایک خوبصورت نظم لکھی ہے جس میں والد کے بچھڑ جانے اور دعاؤں میں ہمیشہ یاد رکھنے کا تذکرہ ہے۔
انکی صاحبزادی دُعائے عامر نے رمضان ٹرانسمیشن کے ناظرین کو مخاطب کرتے ہوئے لکھا کہ آپ سب نے مجھے میرے مرحوم والد کے ساتھ ٹیلی ویژن پر بڑا ہوتے دیکھا ہے، اس لیے یہ انتہائی تکلیف دہ ہے کہ یہ والد کے بغیر ہمارا پہلا رمضان ہو گا، والد کو کھونے کا دکھ الفاظ میں بیان نہیں کیا جا سکتا۔
دعائے عامر نے ناظرین اور والد کے مداحوں سے درخواست کی کہ وہ ہمیشہ عامر لیاقت حسین کو اپنی دعاؤں میں یاد رکھیں۔
خیال رہے کہ عامر لیاقت حسین 9 جون 2022 کو اپنی رہائش گاہ پر کمرے میں مردہ حالت میں پائے گئے تھے۔
