ممبئی : ( ویب ڈیسک ) بھارتی فلم انڈسٹری کے معروف اداکار ورون دھون اور اداکارہ جھانوی کپور کی نئی فلم ’ باوال ‘ کا ٹیزر ریلیز کر دیا گیا۔
فلم ’ باوال ‘ کی ہدایتکاری نتیش تیواری نے کی ہے جو اس سے قبل فلم ’ دنگل ‘ کی ہدایتکاری بھی کر چکے ہیں اور یہ فلم ان کی اب تک کی سب سے زیادہ مہنگی فلم بتائی جاتی ہے۔
باوال کے ٹیزر کو شیئر کرتے ہوئے جھانوی کپور نے لکھا کہ ’ محبت کبھی بھی آسان نہیں ہوتی، کچھ باوال کے لیے تیار ہو جاؤ‘ جبکہ فلم کا ٹیزر جاری جنگ کے درمیان ایک المناک محبت کی کہانی کی طرف اشارہ کرتا ہے۔
فلم کی شوٹنگ پیرس، برلن، پولینڈ، ایمسٹرڈیم، کراکو، وارسا کے ساتھ لکھنؤ اور ہندوستان کے دو دیگر شہروں میں کی گئی ہے، فلم کے عملے میں 700 سے زائد افراد شامل تھے جبکہ ایکشن ڈائریکٹر اور اسٹنٹ مین جرمنی سے رکھے گئے تھے۔
خیال رہے کہ فلم ’ باوال ‘ رواں ماہ 21 جولائی کو ایمازون پرائم پر ریلیز کی جائے گی۔
