لاہور: (ویب ڈیسک) پاکستانی شوبز انڈسٹری کے معروف اداکار و میزبان فیصل قریشی نے اونٹ کی ٹانگ کیلئے افسوس کرنے والوں کو تنقید کا نشانہ بنایا ہے۔
فیصل قریشی نے اپنے آفیشل انسٹاگرام ہینڈل کی سٹوری میں جاری کئے گئے نوٹ میں کہا کہ ’اور پھر مغربی میڈیا سے پتا چلا کہ ایک اونٹ کی ٹانگ ہزاروں فلسطینی بچوں کی گردنوں سے افضل ہے‘۔
اداکار نے اُن لوگوں کیلئے افسوس کا اظہار کیا جو اونٹ کی ٹانگ کاٹنے پر ظالم وڈیرے کے خلاف سوشل میڈیا پر سراپا احتجاج ہیں۔
واضح رہے کہ حال ہی میں سانگھڑ میں اپنی زمینوں میں داخل ہونے پر ظالم وڈیرے نے ملازمین کے ہمراہ اونٹ کو بہیمانہ تشدد کا نشانہ بنانے کے بعد تیز دھار آلے سے اس کی ٹانگ کاٹ دی تھی۔
اس واقعے کی ویڈیو سوشل میڈیا پر وائرل ہوئی تو سوشل میڈیا صارفین غم و غصے سے بھڑک اُٹھے تھے، ویڈیو میں اونٹ کو بلبلاتے اور روتے ہوئے دکھایا گیا تھا، اونٹ کے مالک نے بھی کٹی ہوئی ٹانگ اٹھا کر پریس کلب سانگھڑ پر شدید احتجاج کیا تھا۔
