کراچی: (ویب ڈیسک) مودی سرکار نے عالمی شہرت یافتہ صوفی گلوکارہ عابدہ پروین کا انسٹاگرام اکاؤنٹ بھی بند کر دیا۔
واضح رہے کہ پاکستان سے کشیدگی کے باعث متعدد پاکستانی مشہور شخصیات کے سوشل میڈیا اکاؤنٹس اور مواد کو بھارت میں محدود یا مکمل طور پر بلاک کیا جا رہا ہے اور عابدہ پروین جنہیں صوفی موسیقی کی روحانی آواز کے طور پر عالمی سطح پر پذیرائی حاصل ہے اس پابندی کی تازہ ترین شکار ہیں۔
بھارتی صارفین کو ان کے پروفائل تک رسائی کی کوشش پر پیغام موصول ہو رہا ہے کہ یہ اکاؤنٹ بھارت میں دستیاب نہیں، کیونکہ قانونی درخواست پر عمل کیا گیا ہے۔
عابدہ پروین کے گیت جیسے ’’تو جھوم، میں نرائے مستانہ، پردہ داری، چھاپ تلک اور آقا‘‘ ناصرف پاکستان بلکہ بھارت اور دنیا بھر میں لاکھوں مداحوں کے دلوں کی دھڑکن ہیں۔
عابدہ پروین صوفیانہ موسیقی سرحدوں سے ماورا ہو کر محبت اور انسانیت کا پیغام پھیلاتی ہیں اور ان کے فن نے ہمیشہ دلوں کو جوڑنے اور روحانیت کو فروغ دینے کا کام کیا ہے، اس پابندی پر سوشل میڈیا پر بھارتی اور پاکستانی مداحوں نے شدید افسوس اور ناراضگی کا اظہار کیا ہے۔
کئی صارفین نے اس فیصلے کے سکرین شاٹس شیئر کرتے ہوئے مطالبہ کیا کہ فن اور موسیقی کو سیاسی تنازعات سے الگ رکھا جائے، ایک بھارتی مداح نے لکھا عابدہ پروین کی آواز دلوں کو جوڑتی ہے، اسے سرحدوں میں قید کرنا افسوسناک ہے۔
