لاہور: (ویب ڈیسک) پاکستان ٹیلی وژن کے شہرہ آفاق ڈرامے الفا براوو چارلی کا ایک مرکزی کردار ’’گل شیر‘‘ ادا کرنے والے سابق کرنل قاسم شاہ نے دلچسپ انکشاف کیا ہے۔
پاکستان کے مقبول ترین فوجی ڈراموں سنہرے دن اور الفا براوو چارلی سے شہرت پانے والے کرنل (ریٹائرڈ) قاسم شاہ نے حال ہی میں ایک انٹرویو میں دلچسپ روداد سنائی ہے۔
سابق کرنل قاسم شاہ نے بتایا کہ الفا براوو چارلی میں سب سے مشہور ہونے والا کردار گل شیر انہیں کس طرح ملا تھا۔
کرنل قاسم شاہ نے بتایا کہ ہدایتکار شعیب منصور سے دلچسپ مکالمہ ہوا تھا، یہ اُن دنوں کی بات ہے جب میں پاکستان ملٹری اکیڈمی (PMA)میں کیڈٹ تھا اور کسی وجہ سے اکیڈمی میں سزا کے طور پر رکا ہوا تھا جب کہ باقی سب کیڈٹس چھٹی پر چلے گئے تھے۔
ریٹائرڈ قاسم شاہ نے مزید بتایا کہ ایک دن کمانڈر صاحب نے بلایا اور کہا کہ شعیب منصور دو دن کے لیے آئے ہیں، تمیں ان کے ساتھ رہنا ہے اور کمپنی دینی ہے۔
سابق کرنل قاسم شاہ نے بتایا کہ میں نے شعیب منصور کو اکیڈمی کے مختلف حصے دکھائے، وہ مسلسل مجھے دیکھتے اور مسکراتے رہے جس پر میں حیران بھی ہوا تھا، پھر شعیب منصور چلے گئے اور میں یہ سب بھول گیا لیکن دو ماہ بعد اچانک مجھے اکیڈمی ہیڈ کوارٹر میں بلایا گیا جہاں ناموراداکار پہلے ہی بیٹھے ہوئے تھے۔
سم شاہ نے بتایا کہ پہلے میں سمجھا کہ مجھ سے شاید کوئی غلطی ہوگئی ہے لیکن وہاں مجھے ایک سکرپٹ دیا گیا اور کہا گیا کہ اسے پڑھو، انہوں نے بتایا کہ میں گھبرا گیا لیکن جب ڈائیلاگ بولے تو سب بہت خوش ہوئے اور کہنے لگے ہمیں ہمارا گل شیر مل گیا۔
سابق کرنل قاسم شاہ نے بتایا یوں مجھے الفا براوو چارلی میں گل شیر کا کردار مل گیا اور سب سے زیادہ یہی کردار مقبول بھی ہوا تھا۔
خیال رہے کہ 25 سال قبل پیش کیا گیا یہ ڈرامہ آج بھی لوگوں کے ذہنوں میں نقش ہے، گل شیر کی سادگی اور معصومیت نے سب کے دل موہ لیے تھے۔
