لاہور : (ویب ڈیسک) پاکستان کی فنکار برادری نے خضدار میں سکول بس پر حملے پر شدید غم و غصے کا اظہار کرتے ہوئے کہا ہے کہ معصوم بچوں کو نشانہ بنانا انسانیت کے خلاف جرم ہے۔
خضدار میں دل دہلا دینے والے دہشت گرد حملے میں سکول بس کو نشانہ بنایا گیا، جس کے نتیجے میں 3 معصوم بچے شہید جبکہ کئی زخمی ہوگئے، یہ حملہ بھارت کے حمایت یافتہ دہشت گردوں کی جانب سے کیا گیا۔
اداکارہ درفشاں سلیم نے انسٹاگرام پر لکھا کہ خضدار میں بچوں کی سکول بس پر حملے نے مجھے ہلا کر رکھ دیا ہے، کیسے کوئی اتنا بےحس ہو سکتا ہے کہ معصوم بچوں کو نشانہ بنائے؟ ہر دن کی خبر پہلے سے زیادہ دلخراش ہوتی ہے، یہ معمول نہیں ہے اور نہ ہی ہمیں اسے معمول بننے دینا چاہئے۔
اداکار شہروز سبزواری نے انسٹا پر لکھا ہے کہ بزدل دشمن نے سکول کے معصوم بچوں کو نشانہ بنایا۔
ماورا حسین نے کہا کہ ہر نئی خبر پہلی سے زیادہ تکلیف دہ ہوتی ہے، بچوں پر حملہ انسانیت کے خلاف جرم ہے، دنیا کو کیا ہو گیا ہے؟ انسانیت کہاں چلی گئی؟
سمیع خان، کرن حق، عاصم محمود، فضا خاور اور ایمن خان نے بھی اس وحشیانہ فعل کی شدید مذمت کی اور متاثرہ خاندانوں سے اظہارِ ہمدردی کیا۔
ان کا کہنا تھا کہ پوری قوم اس دلخراش واقعے پر سوگوار ہے اور مطالبہ کر رہی ہے کہ ملوث عناصر کو جلد از جلد کٹہرے میں لایا جائے تاکہ مستقبل میں ایسے بزدلانہ حملوں کا سدباب ہو سکے۔
