لاہور: (دنیا نیوز) لیجنڈ اداکار عابد علی کی چھٹی برسی منائی گئی۔
فرضی کرداروں میں حقیقت کا رنگ بھرنے والے ممتاز اداکار عابد علی مارچ 1952ء میں کوئٹہ میں پیدا ہوئے اور ابتدائی تعلیم بھی کوئٹہ سے حاصل کی۔
اداکار عابد علی نے ریڈیو پاکستان سے اپنے فنی کیرئیر کا آغاز کیا بعدازاں 1973ء میں پاکستان ٹیلی ویژن سے منسلک ہو کر جھوک سیال میں اداکاری کے جوہر دکھائے۔
انہیں امجد اسلام امجد کے قلم بند کئے گئے ڈرامہ وارث سے شہرت حاصل ہوئی، ان کے مقبول ڈراموں میں پیاس، دوریاں، مہندی، دیار دل اور دیگر شامل ہیں۔
اپنی سحِر انگیز اداکاری سے مداحوں کے دلوں پر راج کرنے والے اداکار نے 1993ء میں ڈرامہ سیریل دشت سے ہدایت کاری کا آغاز کیا۔
انہوں نے 70 سے 90 کی دہائی تک پی ٹی وی کے کئی مقبول ڈراموں میں کام کیا، ان کی فنی خدمات کے پرانہیں 1985ء میں پرائیڈ آف پرفارمنس سمیت متعدد ایوارڈز سے بھی نوازا گیا۔
اداکار عابد علی نے دو شادیاں کی تھیں، ان کی پہلی بیوی کا نام حمیرا علی ہے ان سے ان کی تین بیٹیاں ایمان، راحمہ اور مریم علی جبکہ عابد علی نے اداکارہ رابعہ نورین سے 2006ء میں دوسری شادی کی تھی۔
جگر کے سرطان میں مبتلا عابدعلی کو سانس کی تکلیف کے باعث 30 اگست کو کراچی کے نجی ہسپتال منتقل کیا گیا تھا تاہم وہ جانبر نہ ہو سکے اور 5 ستمبر کو خالق حقیقی سے جا ملے لیکن وہ اپنی جاندار اداکاری کی وجہ سے ہمیشہ اپنے پرستاروں کے دلوں میں زندہ رہیں گے۔
