لاہور: (ویب ڈیسک) پاکستانی اداکارہ اور پروڈیوسر عائشہ عمر نے انکشاف کیا کہ کم عمری میں شوبز انڈسٹری میں قدم رکھنے کے بعد بہت سے لوگ اپنی حد سے تجاوز کرنے کی کوشش کرتے تھے۔
حال ہی میں اداکارہ اور پروڈیوسر عائشہ عمر نے ایک کامیڈی شو میں شرکت کی جہاں انہوں نے اپنے کیریئر کے ابتدائی دنوں کی مشکلات پر کھل کر بات کی۔
انہوں نے بتایا کہ کم عمری میں شوبز کی دنیا میں قدم رکھتے ہوئے انہیں متعدد چیلنجز کا سامنا کرنا پڑا اور وہ ایک چیلنجنگ دور تھا، اکثر لوگ انہیں سنجیدگی سے نہیں لیتے تھے کیونکہ ایک تو ان کی عمر کم تھی، دوسرا یہ کہ وہ بے حد کھلنڈری سی لڑکی کے طور پر نظر آتی تھیں۔
اداکارہ نے کہا کہ بہت سارے مرد حضرات حدیں پار کرنے کی کوشش کرتے تھے اور اس دوران مجھے خود کو مضبوط ظاہر کرنا پڑتا تھا تاکہ کوئی یہ نہ سمجھے کہ میں کمزور ہوں، اسی لئے میں نے ایک نان سینس رویہ اپنا لیا تاکہ لوگ مجھے سنجیدگی سے لیں۔
عائشہ عمر نے مزید بتایا کہ جب وہ لاہور سے کراچی منتقل ہوئیں اور اکیلے زندگی گزارنے لگیں تو یہ طرز عمل اور بھی ضروری ہوگیا کیونکہ اکیلی لڑکی کو اکثر کمزور سمجھا جاتا ہے، اس لئے مجھے اور زیادہ سخت رویہ اپنانا پڑا۔
شو کے دوران گفتگو کرتے ہوئے اداکارہ نے کیریئر میں ہونے والی چند غلطیوں کا بھی اعتراف کیا، ان کا کہنا تھا کہ انہوں نے ماضی میں کچھ ایسے ایوارڈ شوز کئے جن کی مکمل ادائیگی آج تک نہیں ہو سکی۔
