لاہور: (دنیا نیوز) مدھر آواز، ہر گیت بے مثال، گلوکار مسعود رانا کو مداحوں سے بچھڑے 30 برس بیت گئے۔
مسعود رانا 9 جون 1938ء کو میرپورخاص کے ایک زمیندار کے گھر پیدا ہوئے، 1962ء میں گلوکاری کا آغاز کیا اور پہلی فلم انقلاب کے لئے پہلا گانا گایا لیکن اصل شہرت پنجابی فلم ڈاچی سے ملی۔
مسعود رانا اردو اور پنجابی فلموں کے صَف اوّل کے گلوکار تھے، تین عشروں پر محیط کیریئر کے دوران انہوں نے 500 سے زائد فلموں کے لئے گانے گائے، چند لالی ووڈ فلموں میں بطور اداکار بھی جلوہ گر ہوئے۔
ان کے گائے ہوئے گانے اداکار ندیم، محمد علی، وحیدمراد، غلام محی الدین سمیت پاکستان کے تمام بڑے اداکاروں پر فلمبند ہوئے، مسعود رانا نے کئی ملی نغمے بھی گائے، 1965ء اور 1971ء کی جنگ میں گائے ہوئے ان کے جنگی ترانے آج بھی خون کو گرما دیتے ہیں۔
دنیائے موسیقی کا یہ روشن ستارہ چار اکتوبر 1995ء کوہمیشہ کے لئے غروب ہو گیا لیکن وہ اپنی فنی خدمات کی بنا پر اپنے لاکھوں پرستاروں کے دلوں میں ہمیشہ روشن رہیں گے، مسعود رانا کو نگار ایوارڈز سے بھی نوازا گیا۔
