لاس اینجلس: (ویب ڈیسک) دنیا کی مشہور پاپ سٹار ٹیلر ایلسن سوئفٹ نے اپنا 12 واں سٹوڈیو البم ’دی لائف آف اے شوگرل‘ ریلیز کر دیا جو 12 ٹریکس پر مشتمل ہے۔
ٹیلر سوئفٹ نے البم کے آغاز کا اعلان انسٹاگرام سٹوریز کے ذریعے ایک دلچسپ کلپ کے ساتھ کیا جس میں ایک نارنجی رنگ کا دروازہ دکھایا گیا جو ان کے نئے تخلیقی دور میں داخلے کی علامت ہے، البم کا مجموعی دورانیہ تقریباً 42 منٹ پر مشتمل ہے جو ٹیلر سوئفٹ کے حالیہ ریلیزز کے مقابلے میں نسبتاً مختصر ہے۔
البم میں 12 ٹریکس شامل ہیں، ہر گانے میں پاپ بیٹ اور شاعرانہ لریکس کا امتزاج پایا جاتا ہے اور البم آغاز سے لے کر اختتام تک ایک مربوط کہانی سناتا ہے۔
یہ پروجیکٹ ٹیلر سوئفٹ کو ایک بار پھر مشہور پروڈیوسرز میکس مارٹن اور شیل بیک کے ساتھ جوڑتا ہے جنہوں نے پہلے ہی سوئفٹ کے بڑے ہٹس شیک اٹ آف اور بیڈ بلڈ تخلیق کیے ہیں، ان کی پروڈکشن ہر ٹریک کو منفرد مگر مربوط انداز میں تیار کرتی ہے جو البم کو ایک مکمل میوزیکل پیکیج بناتا ہے۔
ٹیلر سوئفٹ نے اپنے منگیتر اور مشہور نیٹ فلکس سٹار ٹریوس کیلسی کے پوڈکاسٹ ”نیو ہائٹس“ میں اگست میں اپنے اس البم کی باقاعدہ تصدیق کی تھی۔
ٹیلر سوفٹ نے اعلان کیا تھا کہ ”دی لائف آف اے شو گرل“ کے نام سے میرا البم ریلیز ہونے والا ہے جس میں 12 گانے شامل ہوں گے اور اسے 3 اکتوبر 2025 کو ریلیز کیا جائے گا۔
پوڈکاسٹ میں البم کے بارے میں بات کرتے ہوئے سوئفٹ نے کہا تھا کہ یہ وہ البم ہے جو میں ہمیشہ سے بنانا چاہتی تھی، میرا مقصد ایسی دھنیں دینا تھا جو اتنی دلکش ہوں کہ سننے والے انہیں بھلا ہی نہ سکیں۔
