لاہور: (دنیا نیوز) پاکستان شوبز انڈسٹری کی مایہ ناز اداکارہ فائزہ حسن نے انکشاف کیا ہے کہ کالج میں ہر تین چار ماہ بعد کسی پر دل آجاتا تھا، اب تو تعداد بھی یاد نہیں ہے۔
باصلاحیت اداکارہ فائزہ حسن نے حال ہی میں دنیا نیوز کے مزاحیہ پروگرام "مذاق رات" میں شرکت کی جہاں انہوں نے اپنے کیریئر کے ابتدائی کٹھن دنوں کے تلخ تجربات اور سخت مشکلات سمیت دیگر معاملات پر کھل کر بات کی۔
مذاق رات میں گفتگو کرتے ہوئے اداکارہ فائزہ حسن نے انکشاف کیا کہ شوبز میں قدم رکھتے ہی انہیں بار بار ریجیکشن کا سامنا کرنا پڑا، مجھ سے ڈیمانڈ کی گئی تھی کہ ناک کی پلاسٹک سرجری کرواؤ، وزن کم کرو حالانکہ میں تو دُبلی پتلی تھی، آج پرانے ڈرامے دیکھ کر لگتا ہے میں تو بالکل فٹ تھی۔
فائزہ حسن نے شوبز کے حسن کے معیار پر طنز کرتے ہوئے کہا ہے کہ یہ سب مارکیٹنگ ہے، جیسے صابن کی پیکنگ خوبصورت لگتی ہے تو لوگ خرید لیتے ہیں لیکن اگر اندر سے اچھا نہ نکلے تو دوبارہ کوئی نہیں خریدتا۔
انہوں نے مزید کہا ہے کہ اداکاری میں بھی یہی اصول ہے، خوبصورتی ایک بار کام دلا سکتی ہے لیکن بار بار صرف اچھی پرفارمنس ہی کام آتی ہے، وہ جان بوجھ کر کم ڈرامے کرتی ہیں کیونکہ وہ صرف ایسے کردار قبول کرتی ہیں جو ان کے دل کو چھو جائیں۔
دلچسپ بات یہ رہی کہ فائزہ حسن نے اپنی یکطرفہ محبتوں کے قصے شیئر کرتے ہوئے کہا ہے کہ ہاں، یکطرفہ محبت ہوتی ہے، میرے ساتھ تو کئی بار ہوا۔
وہ کچھ دیر کے لیے ماضی میں کھو گئیں اور مسکراتے ہوئے کہا کہ پہلی بار 17 یا 18 سال کی عمر میں کالج کے ایک لڑکے کو پسند کیا، پھر ہر تین چار ماہ بعد کسی نہ کسی پر دل آ جاتا تھا، اب تو گنتی بھی یاد نہیں۔
