بالی ووڈ کے لیجنڈری اداکار دھرمیندر ہسپتال سے گھر منتقل

ممبئی: (ویب ڈیسک) بالی ووڈ کے لیجنڈری اداکار دھرمیندر کو ممبئی کے بریچ کینڈی ہسپتال سے ڈسچارج کر دیا گیا۔

بھارتی میڈیا کے مطابق سینئر اداکار دھرمیندر کے ڈاکٹر پریت صمدانی کا کہنا ہے کہ دھرمیندر کے اہل خانہ نے انہیں گھر لے جانے کا فیصلہ کیا ہے جس کے بعد بدھ صبح 7.30 بجے کے قریب انہیں ہسپتال سے ڈسچارج کردیا گیا۔

ڈاکٹر پریت صمدانی کا کہنا ہے کہ اب دھرمیندر کا علاج ان کے گھر پر ہی کیا جائے گا۔

یاد رہے کہ گزشتہ روز بھارتی میڈیا کے بڑے ناموں انڈیا ٹوڈے، اے بی پی نیوز اور نیوز 18 سمیت ہندوستان ٹائمز نے دھرمیندر کی موت کی خبر چلائی تھی جسے ان کے اہلخانہ نے مسترد کرتے ہوئے میڈیا پر شدید برہمی کا اظہار کیا۔

دھرمیندر کی اہلیہ ہیما مالنی نے بھی اپنی ٹوئٹ میں بھارتی میڈیا کو کھری کھری سناتے ہوئے لکھا تھا کہ جو کچھ ہو رہا ہے وہ ناقابل معافی ہے ذمہ دار چینلز ایسے شخص کے بارے میں جھوٹی خبریں کیسے پھیلا سکتے ہیں جس کا علاج ہو رہا ہے اور وہ صحت یاب ہو رہے ہیں؟ یہ تذلیل اور غیر ذمہ دارانہ عمل ہے، براہ کرم ہماری فیملی کو پرائیویسی دیں‘۔

دھرمیندر کی صاحبزادی ایشا دیول نے بھی انسٹاگرام پر ایک بیان جاری کیا، جس میں افواہوں کی تردید کرتے ہوئے کہا کہ ’میڈیا بے بنیاد خبریں پھیلا رہا ہے، میرے والد کی صحت مستحکم ہے اور وہ صحتیاب ہو رہے ہیں، ہم تمام مداحوں سے درخواست کرتے ہیں کہ ہمارے خاندان کو پرائیویسی دی جائے، آپ سب کی دعاؤں کا شکریہ‘۔