لاہور: (ویب ڈیسک) معروف اداکار، ہدایتکار، پروڈیوسر یاسر نواز نے اپنی اہلیہ، اداکارہ و میزبان ندا یاسر کو تنقید کا نشانہ بنانے والی ساتھی اداکارہ فضا علی کو آڑے ہاتھوں لے لیا۔
انہوں نے اپنی اہلیہ کا دفاع کرتے ہوئے فضا علی کے عمل کو سستی شہرت کا طریقہ قرار دیا۔
سوشل میڈیا پر جاری کردہ ویڈیو پیغام میں یاسر نواز نے فضا علی کو مخاطب کیا اور کہا کہ میری معصوم بیوی کا پیچھا چھوڑ دو، تم تو مسلسل مشہور ہو رہی ہو، اب کیا اس کی جان لو گی؟ اللہ بھی معاف کر دیتا ہے انسان معاف نہیں کرتا۔
انہوں نے کہا کہ ندا کو معاف کردو، جتنا مشہور ہونا تھا ہو چکی ہو بس ختم، اب اس چیپٹر کو بند کرو اور آگے چلو کسی اور کو پکڑو اور اس کی بینڈ بجاؤ۔
اس سے قبل اداکارہ فضا علی نے فوڈ ڈیلیوری رائیڈرز سے متعلق ندا یاسر کے بیان پر انہیں تنقید کا نشانہ بنایا تھا۔
بات یہیں ختم نہیں ہوئی بلکہ جب ندا یاسر نے فوڈ ڈیلیوری رائیڈرز سے عوامی معافی مانگی تو فضا علی نے ایک اور ویڈیو پیغام جاری کرتے ہوئے میزبان کو معافی پر بھی تنقید کا نشانہ بنایا اور کہا کہ معافی سے پہلے کی گئی غلطی کا خمیازہ نہیں بھرا جا سکتا۔
