'نوبل انعام کا حقدار نہیں، مسئلہ کشمیر حل کرنیوالا ہی اس ایوارڈ کا اہل ہوگا'

اسلام آباد: (دنیا نیوز) وزیراعظم عمران خان کا کہنا ہے وہ نوبل انعام کے حق دار نہیں، برصغیر میں انسانی ترقی اور امن کو راستہ دینے والا نوبل پرائز کا صحیح اہل ہوگا۔

 وزیراعظم عمران خان نے سماجی رابطے کی سائٹ ٹوئٹر پر اپنی تازہ ترین ٹوئٹ میں کہا ہے میں نوبل انعام کاحق دار نہیں، نوبل پرائز کا وہ حق دار ہوگا جو مسئلہ کشمیر حل کرے گا۔ انہوں نے کہا جو عوام کی خواہشات کے مطابق مسئلہ کشمیر حل کرے وہی اس ایوارڈ کا حق دار بھی ٹہرے گا، برصغیر میں انسانی ترقی، امن کو راستہ دینے والا نوبل پرائز کا صحیح اہل ہوگا۔

I am not worthy of the Nobel Peace prize. The person worthy of this would be the one who solves the Kashmir dispute according to the wishes of the Kashmiri people and paves the way for peace & human development in the subcontinent.

— Imran Khan (@ImranKhanPTI) March 4, 2019

اس سے قبل پائلٹ ابھی نندن کی رہائی اور بھارت کو امن مذاکرات کی پیشکش کے بعد سماجی رابطوں کی مختلف سائٹس پر عمران خان کو امن کا نوبل پرائز دینے کی مہم ٹاپ ٹرینڈ رہی۔ دوسری طرف برصغیر میں قیام امن کے لئے ان کے مستحسن اقدامات کو دنیا بھر کے سربراہان مملکت نے بھی سراہا ہے۔

یاد رہے وزیر اطلاعات فواد چودھری کی جانب سے وزیراعظم عمران خان کو نوبل امن انعام دینے کے لئے قومی اسمبلی سیکرٹریٹ میں قرارداد جمع کرائی گئی تھی۔ جس میں کہا گیا کہ وزیر اعظم عمران خان نے پاکستان اور بھارت کے مابین کشیدگی کم کرنے کے لیے انتہائی دانشمندانہ کردار ادا کیا، بھارتی قیادت کا جنگی جنون دونوں ممالک کے درمیان تناؤ کا سبب بنا، بھارتی قیادت کا اظہارِ جارحیت دونوں ایٹمی ریاستوں کو جنگ کے دہانے پر لے آیا۔

قرارداد میں مزید کہا گیا بھارت کے جنگجو یانہ رویے سے سرحد کے دونوں طرف بسنے والے کروڑوں لوگوں کی زندگیوں کو خطرہ تھا، عمران خان نے فعال کردار ادا کرتے ہوئے مہارت کے ساتھ اس صورتحال کو امن کی جانب موڑ دیا، امن کے لیے خدمات پر وزیراعظم عمران خان کو نوبل امن انعام دیا جائے۔