اسلام آباد: (دنیا نیوز) اپوزیشن جماعتوں کی بیٹھک پر حکومتی ردعمل آ گیا، وزیراعظم عمران خان نے کہا کہ ماضی میں ایک دوسرے پر الزامات لگانے والے کرپٹ ٹولے کے اکٹھے ہونے پر حیرت نہیں۔ فردوس عاشق اعوان کہتی ہیں کہ آج افطار پر صرف اپنی بیرون ملک دولت کو ٹھکانے لگانے کیلئے آ رہے ہیں۔ صمصام بخاری نے کہا آج اپوزیشن کی افطاری کرپشن بچاو افطاری ہے۔
وزیراعظم عمران خان نے بلاول اور مریم ملاقات پر اپنے ردعمل میں کہا ہے کہ ماضی میں ایک دوسرے پر الزامات لگانے والے کرپٹ ٹولے کے اکٹھے ہونے پر حیرت نہیں، سیاسی مافیا معیشت کے ذریعے بلیک میل کرنا چاہتا ہے۔
معاون خصوصی برائے اطلاعات ڈاکٹر فردوس عاشق اعوان نے کہا اپوزیشن جماعتیں آج افطار پر صرف اپنی بیرون ملک دولت کو ٹھکانے لگانے اور اسے تحفظ دینے کی ترکیب سوچیں گے۔
سیاسی بہروپیئے معصوم عوام کو کئی سالوں سے ورغلا کر اپنے کاروباری مفادات کے لیئے استعمال کرنے کے ایجنڈے پر کاربند ہیں، ملکی اور عوامی مفادات کے لیے کوشاں عمران خان کی زیر قیادت 22 کروڑ عوام ان سیاسی بہروپیوں کے دیئے زخموں سے آزاد ہو چکے ہیں اور ان کے جھانسے میں اب نہیں آئیں گے۔
— Firdous Ashiq Awan (@Dr_FirdousPTI) May 19, 2019
انھوں نے مزید کہا کہ سیاسی بہروپیوں کیلئے عوام سے زیادہ کاروباری مفادات مقدم ہیں، عوام اب ان بہروپیوں کے جھانسے میں نہیں آئیں گے۔
جس اولاد کے لیے مال پانی اکٹھا کیا گیا وہ بینیفیشریز لوٹ کے مال کو تحفظ دینے کے لیے لاحہ عمل پر غور کریں گے۔ انہیں پاکستان کے عوام کا نہ کوئی دکھ ہے نہ درد، آج افطار پر صرف اپنی بیرون ملک دولت کو ٹھکانے لگانے اور اومنی گروپ کے باب کو تحفظ دینے کی ترکیب سوچیں گے۔
— Firdous Ashiq Awan (@Dr_FirdousPTI) May 19, 2019
وزیراطلاعات پنجاب صمصام بخاری نے اپنے ردعمل میں کہا کہ آج اپوزیشن کی افطاری کرپشن بچاو افطاری ہے۔ صمصام بخاری نے کہا حکومت اور نیب کا کوئی گٹھ جوڑ نہیں ،عوام کو بجٹ میں ریلیف دیں گے۔
