اسلام آباد: (دنیا نیوز) وفاقی حکومت نے 8 لاکھ سے زائد غیر مستحق افراد کو بے نظیر انکم سپورٹ پروگرام سے نکالنے کا فیصلہ کر لیا ہے۔ ثانیہ نشتر کہتی ہیں کہ اس پروگرام کا نام تبدیل نہیں کر رہے۔ رجسٹریشن کیلئے نادرا کی مدد سے ضلعی سطح پر ڈیسک قائم کیے جائیں گے۔
معاون خصوصی برائے سماجی تحفظ وغربت مٹاؤ پروگرام ڈاکٹر ثانیہ نشتر نے بتایا کہ بے نظیر انکم سپورٹ پروگرام کیلئے ڈیجیٹل پیمنٹ سسٹم بھی لایا جا رہا ہے۔
ثانیہ نشتر نے اعلان کیا کہ حکومت بے نظیر انکم سپورٹ پروگرام کا نام تبدیل نہیں کر رہی۔ کفالت پروگرام کے تحت لائن آف کنٹرول پر خواتین کی مدد کی جائیگی۔
ادھر بلاول بھٹو زرداری نے بینظیر انکم سپورٹ پروگرام سے 8 لاکھ سے زائد افراد کے اخراج کی شدید مذمت کرتے ہوئے کہا ہے کہ حکومتی اقدام غریب خواتین کو خود مختار بنانے کے عمل پر حملہ ہے۔
چیئرمین پیپلز پارٹی نے اپنے ردعمل میں کہا ہے کہ بینظیر انکم سپورٹ پروگرام مستحق خواتین کے لئے لائف لائن ہے۔ حکمران وسائل صرف پیسے والے طبقے میں بانٹ رہے ہیں۔ حکومت چاہتی ہے کہ ملک میں غربت اور بے روزگاری موجود رہے۔ حکمران ایک کروڑ نوکریاں اور 50 لاکھ گھر والے منشور سے پہلے ہی یوٹرن لے چکے ہیں۔ غریبوں پر جاری معاشی حملوں کی ذمہ دار وفاقی کابینہ ہے۔
