لاہور: (دنیا نیوز) وزیراعلیٰ پنجاب سردار عثمان بزدار سے تحریک انصاف کے سینئر رہنما جہانگیر خان ترین نے ملاقات کی، وزیراعلی کہتے ہیں کہ موجودہ حکومت کے خلاف سازشیں کرنے والے پہلے اپنے دور کی لوٹ مار کا حساب دیں۔ جہانگیر ترین کا کہنا ہے کہ اپوزیشن جماعتیں خود انتشار کا شکار ہو کر بکھری ہوئی ہیں۔
وزیراعلی پنجاب عثمان بزدار سے تحریک انصاف کے سینئر رہنما جہانگیر خان ترین کی ایوان وزیر اعلی میں ملاقات ہوئی جس میں باہمی دلچسپی کے امور اور سیاسی صورتحال پر تبادلہ خیال کیا گیا جبکہ جنوبی پنجاب کے سیکرٹریٹ کے قیام سے متعلقہ امور پر بھی مشاورت ہوئی۔
عثمان بزدار کا کہنا تھا کہ وزیراعظم عمران خان کی قیادت میں پاکستان تحریک انصاف کی حکومت مدت پوری کرے گی، موجودہ حکومت کے خلاف سازشیں کرنے والے پہلے اپنے دور کی لوٹ مار کا حساب دیں، ملک کو کنگال کرنے والوں کی سیاست ہمیشہ کیلئے ختم ہو چکی ہے۔ عثمان بزدار کا کہنا تھا کہ سازشی عناصر پہلے کی طرح آئندہ بھی ناکام رہیں گے، پراپیگنڈہ کرنے والوں کو ہزیمت کا سامنا کرنا پڑے گا۔ ڈیڑھ برس میں عوامی فلاح کے پائیدار کام کئے ہیں، ماضی کے حکمران ذاتی نمود و نمائش پر اربوں روپے صرف کرتے رہے۔
عوام سے کئے گئے وعدوں کی تکمیل کیلئے دن رات ایک کر دیں گے۔ ہم کھوکھلے نعرے نہیں لگاتے بلکہ عملی اقدامات کرتے ہیں۔ جنوبی پنجاب سیکرٹریٹ کا معاملہ خوش اسلوبی سے حل ہو جائے گا۔
دوسری جانب جہانگیر ترین کا کہنا تھا کہ وزیراعظم عمران خان کی قیادت میں پاکستان کی سیاسی تاریخ کی شفاف ترین حکومت عوامی خدمت میں ہمہ وقت مصروف ہے۔ اپوزیشن کے پاس کوئی ایجنڈا نہیں۔ اپوزیشن جماعتیں خود انتشار کا شکار ہو کر بکھری ہوئی ہیں۔ ان ہاؤس تبدیلی آئے گی نہ مڈٹرم الیکشن ہوں گے۔
