میانوالی، کندیاں: (روزنامہ دنیا) پی ٹی آئی میانوالی کے بانی رہنما، سینئر صحافی، وزیراعظم عمران خان کے دوست و قریبی ساتھی انوار حسین حقی حرکت قلب بند ہونے سے انتقال کر گئے، ان کی نماز جنازہ مرکزی عیدگاہ میں ادا کی گئی، نماز جنازہ میں ضلع بھر کے صحافیوں، سیاسی، سماجی شخصیات اور شہریوں کی بڑی تعداد نے شرکت کی، قل آج صبح 8 بجے ڈسٹرکٹ فاریسٹ آفس میانوالی گرائونڈ میں ادا کیے جائیں گے۔
دریں اثنا وزیر اعظم نے اپنے ٹویٹ میں انوار حقی کی وفات پر اظہار افسوس کرتے ہوئے ان کی خدمات کو سراہا اور ان کو مشکل وقت کا ساتھی قرار دیا، وزیر اعلیٰ عثمان بزدار، گورنر چو دھری سرور، فردوس عاشق اعوان، جہانگیر ترین، شاہ محمود قریشی، امجد علی خان، ملک احمد خان، سردار سبطین خان، احمد خان نیازی، ملک سجاد احمد، حسن ناصر و دیگر نے اظہار افسوس کرتے ہوئے پسماندگان سے اظہار تعزیت کیا ہے۔
ڈپٹی ڈائریکٹر تعلقات عامہ تنویر خالد کی زیر صدارت ضلعی دفتر اطلاعات میں تعزیتی اجلاس میں انوار حسین حقی کی ناگہانی وفات پر گہرے دکھ اور افسوس کا اظہار کیا گیا۔ شرکا نے مرحوم کے ایصال ثواب کیلئے فاتحہ خوانی اور لوا حقین کیلئے صبر کی دعا کی۔
