لاہور: (دنیا نیوز) پیپلز پارٹی پنجاب کے صدر قمر زمان کائرہ نے کہا ہے کہ حکومتی ناکامی سے کورونا کے پھیلنے کا خطرہ موجود تاہم لاک ڈاؤن کی وجہ سے اس کو کنٹرول میں مدد ملی ہے۔
قمر زمان کائرہ کا ڈویژنل اور ضلعی صدور کیساتھ ویڈیو لنک پر اجلاس سے خطاب میں کہنا تھا کہ پاکستان کی بدقسمتی رہی کہ وزیراعظم وقت پر فیصلے نہ کرسکے اور انہوں نے اچھے فیصلوں کی مزاحمت کی۔
پیپلز پارٹی رہنما نے الزام عائد کیا کہ وفاقی حکومت نے بروقت حکمت عملی اختیار نہیں کی۔ اپوزیشن اور میڈیا نے حکومتی ناکامیوں کو بھرپور اجاگر کیا۔ دوسری جانب کورونا بحران میں چئیرمین بلاول بھٹو کی قیادت میں سندھ حکومت نے لیڈ کیا ہے۔ وزیراعظم نے سندھ حکومت کی تعریف میں ایک لفظ نہیں کہا بلکہ ہمیشہ تنقید کا نشانہ بنایا۔
انہوں نے مطالبہ کیا کہ حکومت بے نظیر انکم سپورٹ پروگرام کے ذریعے رقم مستحقین میں تقسیم کرے۔ ان کا کہنا تھا کہ پنجاب میں کورونا تیزی سے پھیل رہا ہے، مگر ٹیسٹنگ کے اعتبار سے صوبہ سب سے پیچھے ہے۔
