لاہور: (دنیا نیوز) وزیراعلیٰ پنجاب نے کہا ہے کہ شراب لائسنس کے معاملے پر ابہام دور کرنے کیلئے حقائق نیب کے سامنے رکھے، دامن صاف ہے، جب بھی بلایا جائے گا، پیش ہوں گے، قوم نے کل قانون شکنی اور آج قانون پسندی کا مظاہرہ دیکھا۔
نیب پیشی کے بعد وزیراعلیٰ پنجاب عثمان بزدار نے اپنے بیان میں کہا قانونی تقاضے پورے کرتے ہوئے ذاتی حیثیت سے نیب کے سامنے پیش ہوا، صرف ایک گاڑی میں بغیر پروٹوکول نیب کے دفتر گیا، نیب کے سامنے اپنا موقف پیش کیا، لائسنس کے معاملے پر ابہام دور کرنے کیلئے حقائق نیب کے سامنے رکھے، ہم آئینی اداروں کے احترام پر یقین رکھتے ہیں، نئے پاکستان میں کوئی قانون سے بالاتر نہیں۔
عثمان بزدار کا کہنا تھا نیب میں پیش ہو کر قانون کی بالادستی کو تسلیم کرنے کی روایت قائم کی، عدالت اور خصوصی کمیشن میں بھی جا کر موقف پیش کر چکا ہوں، گزشتہ روز نیب کے دفتر کے باہر ہنگامہ آرائی اور قانون شکنی کا مظاہرہ کیا گیا، قانون شکن عناصر نے خود کو ایکسپوز کیا، قانون کی پاسداری ہر شہری کا فرض ہے، پنجاب میں قانونی ضوابط کے مطابق امور حکومت چلا رہے ہیں۔
