اسلام آباد: (ویب ڈیسک) وفاقی حکومت نے بدھ سے 50 سے 59 سال تک کی عمر کے لوگوں کو ویکسین لگانے کا عمل شروع کرنے کا فیصلہ کر لیا۔
اس بات کا فیصلہ آج اسلام آباد میں نیشنل کمانڈ اینڈ آپریشن سینٹر کے ایک اجلاس میں کیاگیا جس کی صدارت منصوبہ بندی اور ترقی کے وزیر اسد عمر نے کی۔
Decision taken in today s NCOC meeting to start vaccination of people in the age group of 50 to 59 from Wednesday the 21st of april. Would once again encourage everyone to register for the vaccination
— Asad Umar (@Asad_Umar) April 17, 2021
اجلاس کے بعد سماجی رابطے کی ویب سائٹ ٹویٹر پر ٹویٹ کرتے ہوئے انہوں نے ایک بار پھر لوگوں سے کہا کہ وہ ویکسین لگوانے کیلئے اپنا اندراج کرائیں۔
دوسری طرف کورونا وائرس سے 112 افراد جاں بحق ہوگئے، جس کے بعد اموات کی تعداد 16 ہزار 94 ہوگئی۔ پاکستان میں کورونا کے تصدیق شدہ کیسز کی تعداد 7 لاکھ 50 ہزار 158 ہوگئی۔
نیشنل کمانڈ اینڈ آپریشن سینٹر کے تازہ ترین اعدادوشمار کے مطابق گذشتہ 24 گھنٹوں کے دوران 4 ہزار 976 نئے کیسز رپورٹ ہوئے، پنجاب میں 2 لاکھ 64 ہزار 10، سندھ میں 2 لاکھ 71 ہزار 524، خیبر پختونخوا میں ایک لاکھ 4 ہزار 480، بلوچستان میں 20 ہزار 760، گلگت بلتستان میں 5 ہزار 174، اسلام آباد میں 68 ہزار 906 جبکہ آزاد کشمیر میں 15 ہزار 304 کیسز رپورٹ ہوئے۔
ملک بھر میں اب تک ایک کروڑ 10 لاکھ 72 ہزار 531 افراد کے ٹیسٹ کئے گئے، گذشتہ 24 گھنٹوں کے دوران 65 ہزار 279 نئے ٹیسٹ کئے گئے، اب تک 6 لاکھ 54 ہزار 956 مریض صحتیاب ہوچکے ہیں جبکہ 4 ہزار 149 مریضوں کی حالت تشویشناک ہے۔
پاکستان میں کورونا سے ایک دن میں 112 افراد جاں بحق ہوئے جس کے بعد وائرس سے مرنے والوں کی تعداد 16 ہزار 94 ہوگئی۔ پنجاب میں 7 ہزار 333، سندھ میں 4 ہزار 544، خیبر پختونخوا میں 2 ہزار 832، اسلام آباد میں 631، بلوچستان میں 223، گلگت بلتستان میں 103 اور آزاد کشمیر میں 428 مریض جان سے ہاتھ دھو بیٹھے۔
