اسلام آباد: (دنیا نیوز) شاہ محمود قریشی نے کہا ہے کہ افغانستان میں قیام امن خطے کی ترقی اور استحکام کیلئے ناگزیر ہے، کشمیری مودی کے یک طرفہ اقدامات کو مسترد کر چکے، بھارت کو مقبوضہ کشمیر میں اٹھائے گئے اقدامات پر نظرثانی کرنا ہوگی۔
وزیر خارجہ شاہ محمود قریشی نے اپنے بیان میں کہا ہے کہ وزیراعظم عمران خان کے وژن کی روشنی میں، خطے میں امن و استحکام کیلئے اپنی کاوشیں جاری رکھے ہوئے ہیں، اس حوالے سے ہماری پہلی ترجیح افغانستان کا امن ہے، قیام امن کی صورت میں، چین اور پاکستان دونوں مل کر افغانستان کی تعمیر نو میں اہم کردار ادا کر سکتے ہیں۔
شاہ محمود قریشی کا کہنا تھا کہ ہماری حکومت کی ترجیح جیو اکنامک ہے، ہم پاکستان کو تجارتی سرگرمیوں کا مرکز بنانا چاہتے ہیں، اس حوالے سے ہمارا اکنامک کوریڈور اور گوادر پورٹ اہم کردار ادا کریں گے، وزیراعظم عمران خان کی قیادت میں وسط ایشیائی ریاستوں کے نئے وژن پر عمل پیرا ہیں، علاقائی روابط کا فروغ اور علاقائی امن اس وژن کے دو بنیادی ستون ہیں۔
