اسلام آباد ائیرپورٹ پر بارش اور تیز ہوائیں، فلائنگ کلب کا تربیتی جہاز الٹ گیا

اسلام آباد: (دنیا نیوز) اسلام آباد ائیرپورٹ پر موسلا دھار بارش اور تیز ہواؤں کی وجہ سے فلائنگ کلب کا تربیتی جہاز الٹ گیا۔ انجینئرز نے جہاز کو پہنچنے والے نقصان کا تخمینہ لگانا شروع کر دیا۔

پارکنگ میں موجود نجی کمپنی کا تربیتی چھوٹا طیارہ رات گئے تیز ہوا اور موسلادھار بارش کا دباؤ برداشت نہ کرسکا اور الٹ گیا، جس سے طیارے کو شدید نقصان پہنچا ہے۔

اسلام آباد انٹرنیشنل ائیرپورٹ پر بارش کے بعد تیز ہوا سے دروازوں اور کھڑکیوں کو بھی نقصان پہنچا جبکہ امیگریشن ہال کی چھتیں ٹپکنے لگیں جس کے نتیجے میں کمپیوٹر اور دیگر برقی آلات خراب ہوگئے۔ کچھ مقامات سے چھت کی سیلنگ بھی ٹوٹ کر گر گئی اور اسٹاف کو کام کرنے میں مشکلات کا سامنا ہے۔