اسلام آباد میں عشرہ رحمت اللعالمینﷺ کی مرکزی تقریب کا انعقاد کیا گیا۔تقریب کا آغاز تلاوت کلام مجید سے کیا گیا جبکہ تقریب میں ڈاکٹر عبدالقدیر خان کے لئے فاتحہ خوانی بھی کی گئی۔

تقریب سے خطاب کرنے سے پہلے وزیراعظم عمران خان نے محسن پاکستان ڈاکٹر عبدالقدیر خان کے لئے فاتحہ خوانی کروائی۔ انہوں نے کہا کہ روزانہ اپنی زندگی کا تنقیدی جائزہ لیتا ہوں،18سال کی عمر میں پہلی مرتبہ انگلینڈ گیا،جیسا میں آج ہوں ویسا پہلے کبھی نہیں تھا، موجودہ دور میں نوجوان نسل دباؤ کا شکار ہے۔

وزیراعظم نے کہا کہ زندگی میں دو راستے ہوتے ہیں،ایک راستہ ناجائز دولت کمانے کا اور دوسرا سیرت نبیﷺ پر عمل کرنے کا ہے،اللہ ہمیں نبی ﷺ کی زندگی سے سیکھنے کا کہتا ہے۔

عمران خان کا کہنا تھا کہ  کرپشن غربت کی سب سے بڑی وجہ، معاشرے کو بدعنوانی روکنے کیلئے اٹھنا ہوگا، حکومت میں آنے سے پہلے سب دھاندلی کا شور مچاتے ہیں، اقتدار ملنے کے بعد کوئی اس معاملے پر بات بھی نہیں کرتا، ملک میں پہلی حکومت ہے جو انتخابی اصلاحات کی کوشش کررہی ہے۔

وزیراعظم نے رحمتہ اللعالمینﷺاتھارٹی قائم کرنے کا اعلان کرتے ہوئے کہا کہ اس اتھارٹی میں دنیا بھر کے مذہبی سکالر شامل ہونگے۔